Timor-Leste hato’o beinvindu ba vizita husi delegasaun OMK nian
Governu Timor-Leste remata ona atividade loron primeiru relasiona ho vizita delegasaun Organizasaun Mundiál Komérsiu (OMK) nian mai Timor-Leste durante loron rua.
Delegasaun ne’e mai Timor-Leste atu ko’alia kona-ba pedidu Timor-Leste atubele sai membru OMK nian.
Tuir Ministru Planeamentu no Investimentu Estratéjiku, Kay Rala Xanana Gusmão, “Adezaun ba OMK aliña ho Governu nia planu atu haforsa no haburas ekonomia liuhusi investimentu estratéjiku iha setór potensiál sira. Sai nu’udar membru OMK mós hanesan hakat importante ida atu haforsa ita-nia soberania”.
Ministru Estadu, Koordenadór Asuntu Ekonómiku, no Ministru Agrikultura no Peskas, Estanislau da Silva, hateten mós katak: “Sai nu’udar membru OMK importante tebes atu fó serteza katak Timor-Leste bele mós diversifika nia ekonomia iha komérsiu, indústria no agrikultura ba esportasaun no asesu ba merkadu. Ne’e importante atu kria empregu no hadi’a ema nia moris. Ita presiza investimentu atu aumenta esportasaun iha setór hotu-hotu no nu’udar membru OMK nian sei fasilita tebetebes esportasaun produtu no serbisu Timor nian inklui mós komérsiu ho nasaun seluk”.
Ministru Komérsiu, Indústria no Meiu Ambiente, Constâncio da Conceição Pinto, hateten: “Ha’u kontente simu delegasaun ida ne’e no sei esforsa atu suporta prosesu adezaun nian”.
