Governu Timor-Leste

Primeiru Ministru, Rui Maria De Araújo akompaña husi Ministru Estadu Koordenadór ba Asuntu Ekonomíku no Ministru Agrikultura no Peska Estanislau da Silva, hala’o lansamentu ba programa reabilitasaun kultura produsaun kafé nian iha suku Dukurai, postu administrativu Letefoho, Munisípiu Ermera, iha loron 21 fulan-outubru 2016.

Primeiru Ministru lori Governu Timor-Leste nia naran felisita Ministru Agrikultura no Peska no ekipa tomak no mós agrikultór sira hotu iha suku Dukurai, ne’ebé halo esforsu maka’as hodi reabilita kafé ho ektare 500. Sira ne’e hotu, ektare 350 iha munisípiu Ermera no 150 iha munisípiu Likisá.

Timor Leste iha área produsaun kafé ne’ebé boot tebes, maibé seidauk fó fuan ne’ebé maka di’ak, iha ektare rihun nee atus-ida-sianulu, ida ne’e mak ita hakarak atu hadi’a hodi diversifika ita-nia ekonomia, ita tenke prodús kafé barak atu ita bele fa’an. Ne’e hanesan dalan ida hodi hetan osan, tanba kafé Timor ne’e koñesidu iha mundu tomak, no hetan koñesimentu aas iha Amerika nian tanba kafé Timor ne’e kafé ne’ebé orgániku [laiha produtu kímika], tenik Primeiru-Ministru. 

Iha tempu hanesan Ministru koordenadór Asuntu Ekonomika no Ministru Agrikultura no Peskas hateten, kafé ne’e la’ós  buat ida ohin ka horseik nian, maibé kafé ne’e dezde uluk kedas. Tanba ne’e ita presiza iha estratéjia ida atu reabilita kafé iha Timor laran tomak no hahú kuda fila-fali plantasaun sira ne’e.