Governu Timor-Leste

Hafoin hetan aprovasaun iha jeneralidade, proposta Lei kona-ba Kombate Tráfiku Droga, ne’ebé Governu haruka ba Parlamentu Nasionál, hetan ona aprovasaun iha votasaun finál, iha sesaun parlamentár iha loron 18 fulan-outubru.

Nune’e, fó tan pasu ida hodi kumpre Programa Govenu nian iha ámbitu Justisa nian. Iha kápitulu kona-ba Seguransa ba sidadaun sira, Governu hili ona kombate hasoru kriminalidade, prevensaun no repriensaun ba krime hirak ne’ebé relasiona ho droga nu’udar ninia objetivu fundamentál ida entre objetivu fundamentál sira seluk.

Iha ámbitu diploma ida ne’e nian, opta ba fó kastigu ba ema ne’ebé konsume, maibé kastigu ne’e sei foka liu ba tratamentu médiku, tanba rekoñese katak ida ne’e hanesan problema saúde nian ida ne’ebé implika ba nesesidade atu fó apoiu no asisténsia ba ema sira ne’ebé hetan moras ida ne’e.Agora, Governu iha tempu tinan ida atu regula akizisaun no regra sira kona-ba distribuisaun ai-moruk ne’ebé sei uza ba trata moras ne’e. Prevee ona mós katak iha tempu besik nia laran, sei harii entidade nasionál ida ne’ebé sei sai responsavel ba koordenasaun kona-ba kombate droga iha Timor-Leste.

Governu iha devér atu aprezenta ba Parlamentu Nasionál, to’o loron 30 kada tinan, relatóriu ida kona-ba situasaun País nian kona-ba dependénsia ba droga no tráfiku droga nian.