Governu Timor-Leste

Governu liuhusi Ministériu tolu hanesan Ministériu Saúde, Ministériu Agrikultura no Peskas, Ministériu Edukasaun no Konsellu Nasionál ba Soberania, Seguransa, Ai-han no Nutrisaun iha Timor-Leste (KONSSANTIL) komemora Loron Mundiál Ai-han ho tema “Klima muda dadauk ona, Ai-han no Agrikultura tenke muda hodi hadi’a Nutrisaun iha Timor-Leste”. Serimónia ne’e hala’o iha Sentru Konvensaun Baukau, iha loron 10 to’o 14 fulan-outubru tinan 2016.

Objetivu husi komemorasaun ne’e mak atu hasa’e konxiénsia no bolu atensaun komunidade internasionál nian kona-ba problema ai-han iha nivel rejionál, nasionál no globál.

Vise-Ministra Saúde, Ana Isabel Soares, esplika bainhira atu tama iha tinan 2015 ita iha koñesimentu kona-ba Objetivu sira husi Dezenvolvimentu Miléniu (ODM), iha ne’ebé objetivu balun maka Timor-Leste seidauk atinje, ida maka kona-ba nutrisaun. Tanba ne’e maka iha tinan 2015 estadu-membru hotu-hotu ne’ebé maka tama iha membru Nasoins Unidas nian fó-sai fali deklarasaun ida atu muda MDGs ba Objetivu sira husi Dezenvolvimentu Sustentavel (ODS), ho hanoin atu haree fila-fali objetivu hirak ne’ebé seidauk atinje.

Vise-Ministra Saúde aproveita mós biban ne’e hodi agradese ba Prezidente Repúblika, ba esforsu hotu ne’ebé Xefe Estadu ne’e halo ona atu fó apoiu ba Governu atubele atinje ODS sira ne’ebé mak adopta tiha ona.

Iha fatin hanesan, Vise-Ministru Agrikultura no Peskas, Marcos da Cruz, hateten buat ida ne’ebé importante liu husu selebrasaun ne’e mak oinsá bele konsolida esforsu koletivu, envolve komponente hotu iha sosiedade nia laran hodi hadi’a situasaun ai-han no nutrisaun iha rai laran, tanba direitu ba ai-han ne’e nu’udar direitu fundamentál ema nian.

Serimónia ne’e hetan partisipasaun hosi grupu sira iha Munisípiu Baukau ne’ebé hala’o a tividade iha produsaun agríkola, ne’ebé hatudu sira-nia produtu iha baraka hamutuk 20. Loron dahuluk komemorasaun ne’e nian taka ho kompetisaun pintura entre estudante eskola bázika sira husi eskola sanulu-resin iha Postu Administrativu Baukau vila.