Governu Timor-Leste

Ministra Saúde, Maria do Céu S.Pina hala’o abertura ba formasaun ho tema“Hasa’e no kapasita funsionáriu públiku sira Saúde nian hodibele promove boa governasaun” ne’ebé hala’o iha loron 17 to’o loron 20 fulan-outubru tinan 2016, iha Ospitál Nasionál Guido Valadares.

Ministra Saúde apela ba, Diretór no Xefi Departementu sira ne’ebé tuir formasaun ne’e atu bele tau iha prátika matéria formasaun ne’e hodi ezerse sira-nia funsaun ho di’ak liau. Formasaun ne’e tuir formasaun sira ne’ebé hala’o ona iha Ospitál referénsia (4) haat no delegasaun servisu Saúde nian husi munisípiu 12, no Rejiaun Administrativa Zona Espesiál Oekusi, ne’ebé iha kooperasaun husi Ministériu Saúde ho Provedoria Direitus Umanus no Justisa no Inspesaun-Jerál Estadu nian bazeia ba akordu ne’ebé hala’o ona durante tinan rua .

Maria do Céu Pina, husu ba partisipante sira atu uza oportunidade durante loron haat ne’e ho di’ak, liuliu hodi rekoñese ho oneste ba frakeza ne’ebé hasoru ona durante halo atendementu ba ema moras sira. Liuhusi formasaun ne’e bele harii, administrasaun di’ak no hadi’a atendementu ne’ebé di’ak liu ba ema hotu. 

Formadór sira ba formasaun ne’e mai hosi instituisaun tolu (Ministériu, Provedoria no Inspesaun-Jerál) ne’ebé sei fó orientasaun ba partisipante sira kona-ba boa administrasaun, importante maka hodi tulun jestór sira hotu. Ne’ebé inklui atendimentu di’ak ba ema moras no hadi’a prestasaun servisu ba komunidade sira, husi parte jestór no profisionál sira saúde nian, hanesan Ministra hateten ona.

Marka prezensa iha abertura formasaun ida ne’e Provedór Direitus Umanus no Justisa, Silvério Pinto, Inspetór Jerál Estadu, Dr. Francisco de Carvalho, no profisionál sira saúde nian.