Sekretaria Estadu defende partisipasaun ne’ebé boot liután husi feto iha dezenvolvimentu
Sekretaria Estadu ba Apoiu no Promosaun Sósiu-Ekonómika ba Feto, selebra Loron Internasionál Feto Rurál iha suku Maudemo, Postu Administrativu Tilomar, Munisípiu Kovalima, iha loron 13 fulan-outubru 2016, ho Tema “Hakbiit ekonomia feto hametin igualdade jéneru ba dezenvolvimentu Timor-Leste.”
Veneranda Lemos Martins iha ninia diskursu hateten, Sekretaria Estadu ida ne’e hala’o serbisu atu garante igualdade jéneru iha Timor-Leste. Maibé Sekretaria Estadu ida ne’e mesak labele halo buat ida; tenke iha kolaborasaun ho instituisaun lubuk ida, hanesan NGO nasionál, internasionál no ho Ministériu sira seluk atu asegura igualdade jéneru iha instituisaun idak-idak.
Sekretá Estadu ne’e mós hatutan katak feto nia partisipasaun importante tebes ba ita-nia rain. Feto idak-idak tenke sente katak dezenvolvimentu rai ida ne’e, Suku ida ne’e noPostu Administrativu ida ne’e nian depende ba siraidak-idak, tanba ita ko’alia feto ita-nia mane maluk sira iha ita-nia kotuk no sorin apoiu ita maka’as atu lori dezenvolvimentu ne’e ba oin.
Mundu tomak sempre koa’lia kona-ba igualdade jéneru, tanba mane sira mesak de’it labele la’o, feto mesak de’it mós labele la’o. Iha instituisaun ida nia laran bainhira laiha feto iha laran laiha mudansa”, tenik Veneranda Lemos. ”Bainhira ko’alia kona-ba igualdade jéneru, ita la’ós ko’alia de’it kona-ba ba feto ka mane mesak maibé ko’alia ba feto no mane dala ida.”
Administradór Postu Administrativu Tilomar, José Fátima Xavier, reprezenta Administradór Munisípiu Kovalima, agradese ba komemorasaun Loron Internasionál ba Feto iha Postu Administrativu Tilomar. “Ha’u hanoin loron ida ohin importante tebes, la’ós ba feto de’it maibé ba mane mós, tanba durante ne’e iha Munisípiu Kovalima koordenasaun servisu hotu-hotu husi ajénsia no instituisaun Governu nian, sempre iha koordenasaun entre mane no feto, tanba ami respeita ba jéneru, husu atu partisipa másimu iha programa saida de’it mak Munisípiu Kovalima iha”.
Marka prezensa iha serimónia ne’e, Komandante Eskuadra Postu Administrativu Tilomar, ONG nasionál no internasionál sira no komunidade Postu Administrativu Tilomar.
