Governu Timor-Leste

Vise-Ministra Saúde, Ana Isabel Soares, inaugura postu saúde 18, Sentru Saúde 1 no rezidénsia ba pesoál saúde nian 1 ne’ebé halo reabilitasaun iha tinan 2014 to’o 2015 iha Munisípiu Aileu, loron 7 fulan-outubru tinan 2016.

Vise-Ministra iha ninia diskursu hateten, reaabilitasaun fasilidade saúde ne’e hetan apoiu mós  husi instituisaun sira seluk, hanesan Ministériu Estatál, Ministériu Obras Públikas no mósMinistériu Planeamentu no Investimentu Estratéjiku, liuhusi Ajénsia Dezenvolvimentu Nasionál (ADN). “Obra ne’ebé inagura daudaun ne’e obra komunidade nian, tanba ne’e husu ba komunidade tomak atu kuidadu didi’ak hodi nune’e bele dura no bele utiliza ba servisu no asisténsia saúde nian”.

Vise-Ministra ne’e mós lori Ministériu Saúde nia naran agradese Ministériu relevante sira, parseiru dezenvolvimentu iha área saúde nian, klínika privadu no autoridade lokál sira iha Munisípiu Aileu tanba iha kooperasaun di’ak hodi halo servisu saúde ida ne’ebé ho kualidade ba komunidade sira hotu iha área remota sira. Ministeriu Saúde mós kontinua fó apoiu ba programa saúde iha família, klínika movel no mós programa saúde sira seluk hodi prienxe ba fasilidade sira ne’ebé seidauk iha, maibé ho númeru fasilidade ne’ebé iha tiha ona, hein katak iha tempu oin mai sei hasa’e kualidade servisu iha saúde ba komunidade sira hodi kontribui ba redusaun morbilidade (númeru kazu moras nian) no mortalidade (númeru kazu mate nian).

Iha fatin hanesan, Administradór Munisípiu Aileu, João Tilman do Rego, hateten delegasaun, servisu saúde ne’ebé sei fó husi nasionál sei reforsa tan kooperasaun iha munisípiu hodibele sai di’ak liután iha tempu oin mai hodi fó asisténsia saúde ne’ebé di’ak ba komunidade sira.

Marka presensa iha inagurasaun ne’e, Administradór Munisípiu Aileu nian, Komandante PNTL, Delegadu  Saúde nian ho ninia ekipa, inklui autoridade lokál hotu iha Munisípiu Aileu.