Governu Timor-Leste

Ministru Justisa, Ivo Valente hanesan mós Prezidente ba Konferénsia Ministru Justisa País sira Lian Ofisiál Portugés (KMJPLOP), loke reuniaun Komisaun Traballu no Semináriu Internasionál kona-ba Tráfiku Umanu iha ámbitu CPLP (sigla iha lia-portugés) iha Timor Plaza,  iha loron 30 fulan-setembru 2016.

Objetivu hosi konferénsia ne’e atu buka meius hodi kombate krime tráfiku umanu, ne’ebé afeta ba -iha setór sira hanesan seguransa, justisa, relasaun rai-li’ur, kooperasaun no solidaridade sosiál. Nune’e mós nu’udar mekanismu ida atu halo diálogu ho autoridade públika no sosiedade sívil sira ba prevensaun no kombate tráfiku umanu no oinsá fó apoiu ba vítima sira.

Ministru Justisa Ivo Valente iha ninia diskursu abertura hateten, “reuniaun Komisaun Traballu kona-ba Tráfiku Umanu iha ámbitu Konferénsia Ministru Justisa Paíz sira Lian Ofisiál Portugés nu’udar biban atu koa’lia kona-ba oinsá nasaun ida-idak previne no kombate tráfiku umanu no mós atu ezekuta rekomendasaun no atividade sira ne’ebé maka projeta ona iha Planu Asaun Lisboa nian.”

Iha ámbitu esforsu hodi dezenvolve instituisaun no autoridade públika timorense hodi hasoru krime tráfiku umanu, Ivo Valente esplika kona-ba dezenvolvimentu Polísia Sientífika Investigasaun Kriminál (PSIK) nian, hanesan institusaun  ne’ebé tutela hala’o investigasaun kona-ba krime organizadu no komplexu. Durante ne’e PSIK hetan ona apoiu formasaun hosi Polísia Judisiáriu hosi Portugál, iha Programa Apoiu ba Governasaun Demokrátika Timor-Leste nian no Kooperasaun ho União Europeia iha Portugal no liuhusi Camões (Instituto da Cooperação e da Língua, I.P). Polísia Sientífika Investigasaun Kriminál (PSIK) hetan apoiu oioin ba dezenvolvimentu rekursu umanu nian, iha área formasaun teórika espesífika, prátika no ezesísiu hamutuk, investigasaun kriminál, laboratóriu no área espesialidade nian,” dehan Ivo Valente.

Ministru ne’e mós rekoñese dezafiu sira ne’ebé kooperasaun judisiária internasionál no paíz sira CPLP nian enfrenta, no nia fó aten-barani atu kontinua hasa’e kapasidade no fahe esperiénsia sira oinsá mak hasoru kriminalidade transnasionál iha nasaun idak-idak.

Ministru Ivo Valente mós agradese ba membru Grupu Traballu Tráfiku Umanu nian iha Timor-Leste, hanesan Ministériu Justisa, Ministériu Negósius Estranjeirus no Kooperasaun, Sekretária Estadu ba Apoiu no Promosaun Sósiu-Ekonómika ba Feto, no ONG nasionál no internasionál sira iha Timor-Leste.

Reuniaun Komisaun Traballu no Semináriu Internasionál ne’e organiza hosi Ministériu Justisa Timor-Leste no Organizasaun Internasionál ba Migrasaun (OIM).Partisipa iha sorumutuk ne’e hosi Pontu Fokál Tráfiku Umanu hosi Nasaun sira koa’lia Lian Ofisiál Portugés nian mak hanesan Angola, Brazil, Giné-Bisau, Kabuverde, Mosambike, Potugál, Saun Tomé no Prínsipe no Timor-Leste.