Governu publika avaliasaun nasionál kona-ba krime fase-osan nian
Iha loron 7 fulan-outubru, Ministru Justisa, Ivo Valente, aprezenta ona dokumentu públiku ikus ne’ebé tau hamutuk ezersísiu dahuluk kona-ba Avaliasaun Nasionál ba Risku Krime Fase Osan no Finansiamentu Terorizmu nian, no Planu Estratéjiku Nasionál Kombate Krime Fase-Osan no Finansiamentu Terorizmu nian (tinan 2016-2020)
Planu ne’e aprezenta objetivu estratéjiku 10, ho ninia asaun no kalendarizasaun, no mós entidade sira ne’ebé sai hanesan responsavel ba ninia ezekusaun. Nune’e, sidadaun sira bele halo análize entre buat ne’ebé maka hetan iha ámbitu ezersísiu hamutuk ba avaliasaun no sasukat sira ne’ebé Governu kompromete ona atu ezekuta iha tuir ninia Planu Etratéjiku plurianuál.
Hetan aprovasaun iha Konsellu Ministrus, Komisaun Nasionál ba Implementasaun Sasukat sira ne’ebé Destina ba Kombate Krime Fase-Osan no ba Finansiamentu Terorizmu nian ne’ebé ho lia-fuan habadak koñesidu ho naran Komisaun Nasionál ba Kombate Krime Fase Osan (CNCBC-sigla iha lia-portugés), ninia misaun mak atu koordena kona-ba aplikasaun husi rekomendasaun no prátika di’ak sira ne’ebé Grupu Asaun Finanseira Internasionál (GAFI-sigla iha lia-portugés) define ona. Grupu intergovernamentál ida ne’e maka sai nu’udar responsavel atu define padraun internasionál sira kona-ba prevensaun no kombate krime fase-osan, finansimentu terorizmu no proliferasaun arma sira sira ne’ebé bele hamate ema barak. Grupu ida ne’e fó tutela mós ba Grupu Ázia/Pasífiku (GAP) kona-ba Krime Fase-Osan, ne’ebé Timor-Leste sai ona nu’udar membru hahú kedas husi fulan-jullu tinan 2008.
Iha sorumutuk loron 7 fulan-outubru tinan 2016 nian, sorumutuk datoluk Komisaun ne’e nian, aprezenta mós konkluzaun prinsipál sira kona-ba partisipasaun Timor-Leste nian iha Sorumutuk Anuál da-19 GAP nian, ne’ebé hala’o iha San Diego, Kalifórnia (Estadu Naklibur sira Amérika nian), hahú iha loron 5 to’o loron 8 fulan-setembru tinan 2016. Sorumutuk hirak ne’e importante tebes atu koordena esforsu sira kona-ba transparénsia no fahe ba malu prátika di’ak no koñesimentu sira.
Atu halo elaborasaun ba dokumentu rua ne’ebé oras ne’e divulga ona ne’e, Governu VI halo parseria ho Banku Dezenvolvimentu Aziátiku, ne’ebé asegura ona apoiu tékniku hotu, liuhusi Inisiativa Dezenvolvimentu Setór Privadu iha Pasífiku. Aleinde ne’e, Governu mós hetan kolaborasaun husi peritu internasionál Richard Chalmers, no mós husi membru CNBC nian sira, husi ninia Sekretariadu Permanente, no liu-liu, Unidade Informasaun Finanseira, liuhusi nia Diretora Ezekutiva, Maria José Sarmento, aleinde kooperasaun husi setór privadu.
