Komunidade emprezariál elojia medida razoavel sira kona-ba reforma fiskál
Komisaun Reforma Fiskál (KRF), liuhusi serbisu hamutuk ho Kámara Komérsiu no Indústria Timor-Leste (KKI-TL), remata ona konsulta públiku ikus ho komunidade emprezariál iha Timor-Leste molok aprezenta projetu lei sira ba Parlamentu.
Emprezáriu timoroan no investidór estranjeiru lubuk ida, hotu-hotu nu’udar membru KKI-TL nian, maka hola parte iha konsulta ne’e, iha ne’ebe sira ko’alia kona-ba progresu husi reforma fiskál ho projetu lei sira kona-ba impostu sira, inklui introdusaun impostu foun iha Timor-Leste, naran IVA (Impostu kona-ba Valór Akrexentadu).
“Reforma hirak ne’e sei tulun negósiu, atrai investimentu barak no aumenta reseita internu sira”, Vise-Ministru Finansas, Helder Lopes, dehan. “Reforma fiskál sira sei lori benefísiu barak ba komunidade emprezariál. Porezemplu, IVA sei formaliza setór emprezariál no aumenta transparánsia ba tranzasaun ekonómiku sira. Iva mós sei promove esportasaun sira no kria ambiente negósiu nian ida ba empreza lokál no internasionál sira”.
“KKI-TL analiza ona proposta sira kona-ba reforma fiskál no konklui katak reforma sira ne’e sei la todan ba setór privadu.”, Oscar Lima, Presidente CCI-TL, haktuir. Oscar Lima informa mós ba membru sira katak “sei iha aumentu ki’ik balun, ne’ebe presiza duni, iha impostu” no enkoraja komunidade emprezariál atu simu no selu loloos sira-nia impostu.
Konsulta ne’e sai hanesan oportunidade ida ba Ministériu Finansas ho MECAE atu aprezenta memorandu entendimentu ida entre Governu ho KKI-TL kona-ba apoiu ba setór privadu atu aplika medida sira husi reforma ekonómiku ho fiskál.
“Formalizasaun husi ami-nia kooperasaun ho Governu liuhusi memorandu entendimentu ne’e sei tulun haburas setór privadu”, dehan Júlio Alfaro Duarte Jordão de Araújo, emprezáriu no fundadór KKI-TL, ne’ebé hatutan katak “importante tebes fahe informasaun kona-ba ho reforma sira”.
Iha tinan kotuk ba, KRF hala’o konsulta públika barak ho parte interesadu oin-oin, inklui setór privadu, sosiedade sivíl no mós membru Parlamentu sira.
“Susesu husi programa reforma fiskál sei depende ba partisipasaun ativa no kolaborasaun ho parte hotu-hotu ne’ebé iha interese”, Fernanda Borges, Koordenadora ba Komisaun Reforma Fiskál, haktuir. “Importante tebes ba komunidade emprezariál atu kompriende no hatene mudansa hirak ne’ebé hakerek iha lei tributária no mós reforma iha administrasaun fiskál ho aduaneiru ne’ebe hala’o hela. Alterasaun hirak ne’e sei tulun hadi’a empreza sira nia forma servisu nian, oinsá sira prepara sira-nia rejistu finanseiru, no automatiza prosesu pagamentu impostu.”
“Reforma tributária sei akompanã ho melloramentu iha efisiénsia no integridade iha administrasaun impostu no aduaneiru, ne’ebe sei rezulta iha padraun aas iha prestasaun servisu ba públiku ho komunidade emprezariál”, Fernanda Borges hatutan.
Komisaun Reforma Fiskal hanesan órgaun tékniku ida ne’ebe Governu Konstitusionál Timor-Leste VI estabelese, liuhusi Rezolusaun n. 26/2015, ho mandatu atu avalia forma reseita Estadu nian ne’ebé oras ne’e iha, no hirak ne’ebé atu kria. Hadi’a ambiente emprezariál atu promove kreximentnu empreza lokál sira no atrai empreza foun sira sai hanesan prioridade xave ida ba KRF, ne’ebe sei servisu ho ajénsia relevante hotu iha Governu no parte interesadu hotu atu orienta ho implementa reforma sira.
