"Presiza hakbiit liután feto Timor-Leste iha vida ekonómika"
Sekretária Estadu ba Apoiu no Promosaun Sósiu-Ekonómika ba Feto (SEM), Veneranda Lemos Martins, asina Nota Entendimentu ho PT Artca Indonesia, ne’ebé reprezenta husi ninia Diretór, Anjar Budiani, iha loron 15 fulan-setembru 2016, iha Salaun Maria Gorete iha Kaikoli Dili, atu kapasita feto Timor-Leste ba produsaun tais, husi tradisionál modifika ba tais modernu.
Veneranda Lemos hateten, SEM servisu hamutuk ho PT Artca Indonesia, atu hakbiit feto sira iha vida ekonómika, liuliu ba sira ne’ebé mak hetan asesu ba fundu transferénsia públika. SEM identifika fila-fali grupu feto ida ne’ebé mak foti sai hanesan projetu pilotu ba hakbiit feto.
Iha memorandu ne’e mós ko’alia kona-ba diversifikasaun tais hodi sai hanesan setór produtivu ba inan-feton sira ne’ebé hela iha área rurál. Aleinde ne’e, koa’lia mós kona-ba reabilitasaun kafé no kapasita feto sira atu oinsá hatene hala’o negósiu iha área ne’e.
PT Artca mós hahú ona fó formasaun no kapasitasaun ba feto sira liuhusi Ministériu Komérsiu Indústria no Ambiente (MKIA) kona-ba halo tais ho atrativu liu, la’ós atu fa’an de’it maibé bele atrai mós turista sira.
“Ami identifika ona grupu feto sira ne’ebé maka durante ne’e hetan asesu ba fundu transferénsia hosi SEM. Ekipa haree daudauk ona, maizoumenus grupu feto ida ne’ebé maka soru tais ho kualidade di’ak uitoan, atu fó tan ajuda finanseiru para halo di’ak liután, liuhusi formasaun, kapasitasaun ne’ebé mak fó husi PT Artca rasik, “Veneranda dehan.
SEM mós hakarak foka iha preparasaun feto sira nian ba tinan sanulu ka ruanulu mai, bele ho mane sira kaer ekonomia iha rai-laran.
Marka prezensa iha asinatura Nota Entendimentu ne’e makaDiretora-Jerál SEM, Maria José Sanches, Diretór Nasionál Politika Dezenvolvimentu Jenéru, SEM, Henrique da Silva no mós funsionáriu sira hosi SEM.
