Governu Timor-Leste

Governu tulun organizasaun Konferénsia Sosiedade Sivíl ASEAN nian / Forum povu sira ASEAN nian ba tinan 2016, ne’ebé hala’o iha Sentru Konvensaun Dili, husi loron 3 to’o loron 5 fulan-agostu.

Tema husi konferénsia tinan 2016 nian maka “Habelar solidariedade povu sira nian ba komunidade ASEAN ida ne’ebé justa no inkluziva”. Konferénsia ida ne’e partisipa husi delegasaun ema liu 420 ne’ebé mai husi organizasaun sosiedade sivíl hosi paizes membru sira ASEAN nian sira hotu no partisipante sira besik ema na’in 555 hosi Timor-Leste. Partisipa mós iha forum ida ne’e, membru sira balu husi Governu no reprezentate sira korpu diplomátiku nian.

Primeiru-Ministru,  Rui Maria de Araújo, hato’o ninia agradesimentu ba solidaridade no apoiu ne'ebé Organizasaun Sosiedade Sivíl ASEAN nian sira hatudu hodi fó apoiu ba Timor-Leste nia luta ba assegura soberania liuhusi delimitasaun definitiva fronteira marítima sira (ketan tasik) no sira-nia solidariedade ba Timor-Leste nia esforsu atu sai membru ida ASEAN nian, liuhusi  konferénsia ida ne’e, iha Dili.

Hafoin hato’o tiha ninia diskursu, Primeiru-Ministru hala’o diálogu nakloke ida ho partisipante  sira liuhusi hatan ba pergunta sira balu ne’ebé hato’o hosi reprezentante sira sosiedade sivil nian, husi nasaun ASEAN sira no mós Timor-Leste, kona-ba relasaun no servisu hamutuk entre sosiedade sivíl ho Governu, direitus umanus, dezenvolvimentu sosiuekonómiku, auditoria sosiál no Timor-Leste nia adeazaun ba ASEAN.

Atu lee diskursu Primeiru-Ministru nian, bele klik iha ne'e.

Atu lee Komunikadu Imprensa sira Portavós nian,  bele klik iha: Governu simu partisipante sira iha Konferénsia Sosiedade Sivíl ASEAN nian ba tinan 2016 no Konferénsia Sosiedade Sivíl ASEAN nian / Fórum povu sira ASEAN nian ba tinan 2016 termina ona iha Dili.