Sekretaria Estadu Komunikasaun Sosiál no TELKOMCEL garante liña Internet ba funsionamentu ANTIL
Atu asegura portál ANTIL atualiza infomasaun kada oras iha lorloron, Sekretáriu Estadu Komunikasaun Sosiál, asina memorandu entedimentu ida ho TELKOMCEL, iha okaziaun lansamentu Ajénsia Notisioza Timor-Leste nian (ANTIL), iha loron 27 fulan-jullu tinan 2016, iha Dili.
“Objetivu prinsipál husi memorandu ne’e hodi fó apoiu ba iha atividade AJénsia Notisioza Timor-Leste nian, ne’ebé maka sei fasilita sidadaun tomak hodi labele lakon sira-nia direitu atu hetan asesu ba informasaun iha rai laran no mós asesu ba informasaun internasionál sira” dehan Sekretáriu Estadu Komunikasaun Sosiál, Nélio Isaac Sarmento.
Nélio Isaac, hatutan tan TELKOMCEL sei fó apoiu no oferese liña internet ho velosidade boot ba funsionamentu ANTIL nian no halo manutensaun ba Portál ANTIL, ekipamentu ANTIL nian sira hanesan data center no ekipamentu sira seluk, ne’ebé sei hatuur iha akordu tékniku entre Ministériu Prezidénsia Konsellu Ministrus-SECOMS ho TELKOMCEL iha tempu oinmai.
Hosi parte PCM-TELKOMCEL nian reprezenta hosi, Chief Executive Officer, Señór Dedi Suherman. Memorandu entendimentu ne’e ho durasaun ba períodu tinan 1 (ida), no sei hahú vigora iha loron realiza asinutara husi parte sira no bele estende/hanaruk tan ba períodu hanesan, ne’ebé parte sira – empreza no Sekretáriu Estadu - konsidera nesesáriu.
