Governu Timor-Leste

Hala’o ona iha Dili, iha loron 15 fulan-jullu, serimónia entrega sertifikadu  Formasaun Espesializada kona-ba Kombate hasoru Terrorizmu no Siberkrime (krime husi informátika), iha instalasaun PSIK nian, iha Kaikoli, Dili.

Kursu ne’ebé hala’o ho durasaun tempu semana rua ne’e, konta ho partisipasaun husi formandu hamutuk na’in 34, ho knaar hanesan Majistradu, Investigadór Kriminál no Peritu Forense PSIK nian sira, Tékniku Superiór sira husi Servisu Migrasaun no Diresaun-Jerál Alfándega nian, Komisaun Antikorrupsaun, Unidade Informasaun Finanseiru Banku Sentrál Timor-Leste nian, nune’emós hosi Ministériu Justisa.

Asaun ne’e asegura tiha ona, iha nivel tékniku, husi ekipa ida ne’ebé kompostu hosi Inspetór-Xefe Investigasaun Kriminál na’in-rua - João Paulo Ventura no Jorge Duque -, espesialista iha temátika sira ne’e. Sira na’in rua ne’e mai hotu husi Polísia Judisiária Portugál nian, entidade ne’ebé hetan rekoñesimentu internasionál tanba kualidade téknika ne’ebé aas husi ninia ajente sira.

Kursu ne’e integra iha siklu formasaun nian ba tinan rua, tinan 2015-2016, ne’ebé mai asegura formasaun téknika no dezenvolvimentu kapasidade sira iha área investigasaun kriminál, polísia sientífika no análize laboratoriál sira iha Timor-Leste. Ne’e hanesan projetu ida iha ámbitu Komponente Justisa nian husi Programa Apoiu ba Governasaun Demokrátika Timor-Leste, kooperasaun ne’ebé delega husi Uniaun Europeia iha Portugál iha Camões, IP. Hahú iha tinan 2012, no iha parseria ho Ministériu Justisa Repúblika Demokrátika Timor-Leste no ho entidade lokál sira seluk, projetu ne’e akompaña ona kriasaun órgaun polísia kriminál ida ne’ebé iha espesializasaun  aas, iha área ida ne’ebé fundamentál ba dezenvolvimentu Justisa nian iha Timor-Leste.

Polísia Sientífika Investigasaun Kriminál ne’ebé harii iha tinan 2014, kompostu husi elementu na’in 78 (Investigadór Kriminál na’in 47 no Peritu Forense na’in 31), sira hotu hetan ona formasaun iha ámbitu Programa ne’e nian, iha estratéjia ida ho formasaun iha Timor-Leste no iha Eskola Polísia Judisiária nian iha Portugál.

Iha serimónia ne’ebé marka prezensa husi formandu sira hotu no, husi entidade responsavel sira ne’ebé garante formasaun ne’e, reprezentante sira husi instituisaun hirak ne’ebé envolve, maka hanesan Embaixada Portugál nian, iha Dili, Delegasaun Uniaun Europeia no Ministériu Justisa Timor-Leste nian.