Governu Timor-Leste

Sektretáriu Estadu Komunikasaun Sosiál (SEKOMS) husu ba Konsellu Imprensa atu hamriik independente, labele iha influénsia polítika no ekonomia husi indivíduu ka grupu bainhira foti desizaun ruma kona-ba produsaun jornalizmu nian.

Sekretáriu Estadu, Nélio Isaac Sarmento, hato’o ida-ne’e bainhira halo diskursu iha serimónia fó pose ba Diretora Ezekutiva Konsellu Imprensa, Ana Teresa Sequeira, iha lorontersa-feira, 12 fulan-jullu, iha Dili. Prezidente Konsellu Imprensa, Virgílio Guterres maka fó pose ne’e, ho prezensa husi membru Konsellu Imprensa nian sira.

“Konsellu Imprensa ne’e órgaun foun ida iha  Repúblika Demokratika Timor-Leste (RDTL) ho servisu espesífiku atu regula área komunikasaun sosiál no atu fó solusaun ka hanoin ruma ba entidade hotu kona-ba serbisu órgaun komunikasaun sosiál nian” Sekretáriu Estadu dehan.

Nu’udar órgaun foun, nia hatutan, Prezidente Konsellu Imprensa ho nia membru sira sei serbisu maka’as atu forma instituisaun ne’e la’o ba oin. Maibé, Diretora Ezekutiva maka tenke serbisu maka’as liután, atu fasilita serbisu Prezidénsia Konsellu Imprensa nian no fó hanoin ba prezidente kona-ba situasaun jerál iha órgaun komunikasaun sosiál sira, inklui kapasitasaun serbisu jornalizmu  iha Timor-Leste.

Sekretária Estadu Komunikasaun Sosiál asume responsabilidade atu fó nafatin apoiu atividade Konsellu Imprensa nian.

Iha fatin hanesan, Prezidente Konsellu imprensa, Virgílio da Silva Guterres dehan, Konsellu Imprensa sei uza rekursu hotu, legál no profisionál atu fasilita Diretora nia serbisu hodi lidera ezekutivu Konsellu Imprensa. Nia agradese ba Sekretáriu Estadu Komunikasaun Sosiál, ne’ebé tulun prosesu estabelesimentu Konsellu Imprensa no husu nafatin apoiu tékniku iha futuru.Entretantu, Diretora Ezekutiva Konsellu Imprensa, Ana Teresa Sequeira agradese ba membru Konsellu Imprensa ne’ebé fó fiar ba nia atu asume kargu importante ne’e. Nia promote sei uza tempu no kapasidade tomak, atu lidera ekipa Konsellu Imprensa hodi hetan susesu iha nia serbisu loro-loron: “Ha’u sei haka’as aan tuir kbi’it ne’ebé maka ha’u iha hodi kontribui ba dezenvolvimentu Konsellu Imprensa Timor-Leste”.

Konsellu Imprensa nesesáriu duni, la’ós de’it atu fó asisténsia formál no legál, maibé mós atu ajuda públiku kompriende didi’ak papél média nian iha nasaun demokrátiku ida.

Marka prezensa Iha serimónia ne’e, Diretór-Jerál hosi Ministériu Estadu ba Prezidénsia Konsellu Ministru, Victor Maia, Embaixadór Portugál nian iha Timor-Leste,  Manuel Gonçalves de Jesus, Vigáriu Dili nian, Amu Juvito de Araújo, média na’in sira, Diretór órgaun Komunikasaun Sosiálsira, jornalista no mós funsionáriu sira hosi Sekretaria Estadu Komunikasaun Sosiál.