Governu Timor-Leste

Atu garante diseminasaun informasaun hodi promove boa governasaun no kombate korupsaun, Sekretáriu Estadu Komunikasaun Sosiál (SEKOMS),  Nelio Isaac Sarmento, akompaña husi Diretór Sentru Rádiu Komunidade (SRK), asina nota entendementu ho Prezidenti Komisaun Anti Korupsaun (KAK),  iha Salaun Auditóriu Prezidensia Konsellu Ministrus, Palásiu Governu,  loron Kinta,  16 Juñu  2016  .

Sekretáriu Estadu Komunikasaun Sosiál, Nélio Isaac Sarmento hateten, MOU entre KAK no SEKOMS, hatudu dalan di’ak atu kombate korupsaun  no Boa governasaun. Liu hosi meius komunikasaun sosial, Nelio hatutan, KAK sei produz no disamina informasaun ho tópiku diferente.

Sekretáriu Estadu rekuñese, durante ne’e sidadaun sira ladún hatene kona-ba korupsuan no oinsá kombate korupsaun, tanba minimu informasaun. “Hein katak ekipa komunikasaun sosial KAK no ekipa SEKOMS bele servisu hamutuk atu produz informasaun sira relevante ho KAK,” Nelio dehan.

SEKOMS nia parseiru servisu ba media iha Timor laran tomak, alemde media privadu, media estadu, inlkui Radio Metro FM no lakleur sei iha ajensia notisioza.

“Durante ne’e, ami halo koperasaun barak ho instituisaun internasionais atu prepara tékniku sira hodi habelar informasaun ba populasaun, relasiona governu nia programa,” Nelio dehan.

Prezidenti KAK, Aderito Pinto Tilman, hateten, bazeia ba planu estratéjia 2012 - 2020 no Lei KAK No: 8/2009, presiza iha kooperasaun iha rai-laran no rai li’ur, atu iha forsa ba movimentu nasionál luta atu kombate korupsaun.

MOU especial ho SEKOMS, nia objetivu atu divulga informasaun ba komunidade kona-ba prevene no kombate korupsaun, liuhusi informasaun.

“Ita tenki hamoris kultura juridiku iha instituisaun estadu sira. Katak, prosedimentu servisu hotu tenki bazeia ba lei, atu bele asigura boa governasaun. Ita mós prevende funsionariu públiku  ka ajenti estadu, labele komete krimi korupsaun,” Aderito dehan.