Governu Timor-Leste

públiku-privadu ida ba konstrusaun no operasaun portu foun ho nivel internasionál iha baía Tibar, Munísipiu Likisá,  kilómetru 10 iha parte loro-monu Dili nian.

Parseria ne’e ofisializa iha Dili, iha loron 3 fulan-juñu tinan 2016 liuhusi asinatura akordu entre Governu Timor-leste ho konsórsiu Bolloré. Investimentu inisiál ba konstrusaun ne’e mak osan hamutuk dolar millaun 278.3. Husi valór ne’e, dolar millaun 148.85 fornese husi parseiru privadu, konsórsiu Bolloré, no dolar millaun 129.45 Governu maka sei kontribui.

Konstrusaun portu ne’e nian sei hahú iha tinan 2017 no remata iha tinan tolu nia laran. Obra ne’e sei kria kampu serbisu ba ema 1.000 resin. husi númeru ne’e, ema 500 sei hahú serbisu durante faze konstrusaun nian no ema 350 iha operasaun portu ne’e nian durante tinan haat dahuluk no sei aumenta tán 150 iha faze tuirmai ho prioridade ba sidadaun Timor-Leste. 

Terminál ho nivel internasional ne’e sei inklui ponte-kais rua ho medida metru 630 no terminál kontentór nian ne’ebé tinan-tinan, tuir previzaun, bele simu kontentór 870,000 resin to’o konsesaun durante tinan 30 nian remata. Aleinde ne’e sei iha mós edifísiu ba alfándega, Administrasaun atu fó apoiu ba operasaun fasilidade hirak ne’e. Iha projetu fó mós espasu atu halo luan liután iha futuru, bainhira Governu hakarak hasa’e portu  Tibar nia kapasidade operasaun.

Ministru Obras Publikas, Transporte no Komunikasaun, Gastão de Sousa, hafoin asina akordu ne’e hateten katak, akordu ne’e halo hafoin dilijénsia preparasaun no planemanetu durante tinan lima, ne’ebé lidera husi Ministériu Finansas – Unidade PPP, ho kolaborasaun di’ak husi Ministériu Obras Públikas, Transporte no Komunikasaun no Ministériu Planeamentu no Investimentu Estratéjiku.

Prezensa portu baia Tibar, tuir ministru Gastão de Sousa, bele  hadi’a no moderniza infrastrutura iha Timor-Leste, tuir Planu Estratéjiku Dezenvolvimentu ho objetivu atu lori Timor-Leste ba pozisaun rendimentu médiu-altu iha tinan 2030.

Komisaun Nasionál Aprovizionamentu kaer papél sentráliha prosesu konkursu nian tuir padraun profisionalizmu no integridade ne’ebé aas. Akordu ne’e sei mobiliza esperiénsia internasionál, hatene-oinsá [koñesimentu tékniku] no investimentu husi Bolloré Consórcio. Nune’e, portu ne’e sei iha ekipamentu ho  kategoria mundiál ne’ebé sei uza hanesan katalizadór (insentivadór) ba esportasaun Timor-Leste nian.

“Portu ne’e sei kontribui ba Timor-Leste nia kreximentu ekonómiku, dezempeña papél xave ba komérsiu esternu,”  Ministru Gastão de Sousa hateten.