Sorumutuk IV Ministra Responsavel sira ba Igualdade Jéneru CPLP nian
“Empoderamento económico da mulher: género e globalização” [“Hakbiit ekonomia feto sira-nian: jéneru no globalizasaun” maka tema husi sorumutuk entre responsavel sira ba igualdade jéneru husi Komunidade País sira Lian Portugés nian, (CPLP, sigla lian portugés), ne’ebé hala’o iha Díli, iha loron 10 fulan-maiu tinan 2016.
Iha sesaun maklokek sorumutuk ne’e nian, Ministru Estadu, Koordenadór Asuntu Sosiál, António da Conceição, ko’alia kona-ba importánsia husi kestaun sira kona-ba jéneru no fortalesimentu fetos sira nian ba Governu Timor-Leste. Membru Governu ne’e mós fó hanoin hikas kona-ba papél feto sira nian durante funu ba ukun-rasik an no hodi dehan katak edukasaun maka buat ne’ebé fundamentál ba autonomia no kompetitividade feto sira nian.
Iha sorumutuk ne’e, aprova ona mós Planu Asaun 2016-2018, ne’ebé trasa prioridade prinsipál sira no asaun sira ne’ebé atu dezenvolve iha tinan rua oinmai, no mós Deklarasaun Dili nian. Iha deklasaun ne’e, rekoñese “katak hakbiit ekonomia feto sira nian no sira-nia autonomia ekonómika, liuliu liuhosi empriendedorizmu ka kria serbisu ba sira-nia an rasik”, maka fatór esensiál sira “atu to’o ba Objetivu Dezenvolvimentu Sustentavel nian sira no meta sira husi Ajenda tinan 2030 nian, liuliu ba hamenus moris-kiak”. Nune’e, hotui-hotu simu kompromisu atu “dezenvolve esforsu hotu atu realiza reforma sira hodi fó ba feto sira direitu ekonómiku no asesu ne’ebé hanesan ba rekursu ekonómiku sira, nune’e mós asesu ba prioridade no kontrolu kona-ba rai no forma prioridade nian hirak seluk, servisu finanseiru sira, liman-roha no rekursu naturál sira, no promove empregu tomak no serbisu ne’ebé dignu”.
Iha sorumutuk ne’e, asina mós Deklarasaun Kompromisu nian ida husi responsavel governamentál na’in-lima CPLP nian ne’ebé partisipa iha sorumutuk ne’e, maka hanesan: Sekretária Estadu ba Família no Promosaun Feto Angola nian, Ana Paula Neto, Sekretária-Ezekutiva Asuntu sira kona-ba Feto Giné-Bisau nian, Eunice Pereira, Sekretária Estadu ba Sidadania no Igualdade Portugál, Catarina Marcelino, Diretora Institutu Nasionál ba Promosaun Igualdade no Ekuidade Jéneru Saun Tomé no Prínsipe nian, Ernestina Neves, no Sekretária Estadu ba Apoiu no Promosaun Sósiu-Ekonómiku Feto Timor-Leste, Veneranda Lemos, ne’ebé mak sai hanesan uma-na’in ba eventu ne’e. Dokumentu ne’e husu atu Planu Asaun ne’e iha karakter vinkulativu, maske reprezentante govenamentál na’in neen maka la marka prezensa atubele prienxe kuorum, nune’e Timor-Leste halo kompromisu atu haruka dokumentu ne’e ba Estadu-membru sira ne’ebé maka la partisipa atubele asina, hanesan buat ne’ebé mak akontese ona iha sorumutuk CPLP nian sira seluk.
