Ministru no responsavel aas governu nian sira husi CPLP debate Asuntu Tasi nian sira iha Dili
Realizasaun Sorumutuk Ordinária III Ministru Asuntu Tasi nian sira husi Komunidade Nasaun Lia-Portugés (CPLP, sigla iha lian portugés), iha loron 18 fulan-maiu, iha Sentru Konvensaun Dili, fó motivasaun ona ba realizasaun atividade hirak ne’ebé relasiona ho “espansaun ekonomia azúl nian iha kuadru kooperasaun nian ida ba konservasaun no uzu sustentavel husi tasi no oseanu sira”.
Iha loron 15, Governu Timor-Leste lansa ona kampaña ”Tasi moos, ambiente saudavel”, iha Praia dos Coqueiros, iha sede CPLP nia oin, iha Dili. No iha loron 16, iha Sentru Konvensaun Dili, iha mós semináriu internasionál ida ne’ebé prezide husi Ministru Estadu, Koordenadór Asuntu Ekonómiku no Ministru Agrikultura no Peska, Estanislau Aleixo da Silva, debate ona kestaun hirak ne’ebé relasiona ho “CPLP no Tasi: dezafiu no oportunidade sira iha mundu globalizadu”.
Ikus liu, iha loron ikus iha ne’ebé responsavel governamentál sira husi komunidade ne’e marka prezensa, hala’o Sorumutuk Ordináriu III Ministru Asuntu Tasi nian sira husi CPLP. Iha abertura, Primeiru-Ministru, Rui Maria de Araújo, ko’alia liu importánsia Tasi nian iha eskala globál, “no nia laloran baku to’o tama iha nível nasionál, rejionál no to’o iha ita nia komunidade. Estratéjia kooperasaun rejionál oinoin, kona-ba asuntu tasi nian sira, hanesan kona-ba seguransa marítima, kona-ba kombate hasoru peska ilegál, luta hasoru pirataria, konaba parseria sira iha atu protéje ambiente no biodiversidade, sai hanesan tranzversál iha área hotu-hotu mundu nian”. Iha ninia diskursu, Primeiru-Ministru subliña mós katak ”tanba Timor-Leste hanesan Estadu “illa sorin”, asuntu hirak kona-ba tasi ne’e importante tebes. Nu’udar Ita Boot sira hatene katak, ami luta atu, ho roman direitu internasionál nian no Konvensaun Nasoens Unidas nian kona-ba Direitu ba Tasi nian, ami bele tau limite definitivu ba ami nia fronteira maritimu sira atu ami bele asegura ami nia soberania tomak “.
Iha sorumutuk ne’e, aprova ona Planu Asaun Dili, ne’ebé atu tau iha prátika estratéjia CPLP nian ba Oseanu sira, no mós Deklarasaun Dili.
