Governu Timor-Leste

Serimónia asinatura Akordu Espesiál Investimentu ho Kompanhia TL Cement, Lda atu halo investimentu ba produsaun simentu iha Timor-Leste, hala’o iha loron 17 fulan-maiu iha Dili. Akordu ne’e bazeia ba Rezolusaun Governu n. 14/2016, loron 6 fulan-maiu, ne’ebé aprova iha loron 5 fulan-abríl tinan 2016 iha sorumutuk Konselhu Ministrus nian.

Iha serimónia atribui mós ba TL Cement, ne’ebé reprezenta husi ninia Diretór Administrativu, James Rhee, Sertifikadu Investidór no Karta Intensaun Naun-Vinkulativu ne’ebé sei fó posibilidade ba Governu RDTL ba aban-bairua, atu bele partisipa iha investimentu TL Cement nian. Karta Intensaun Naun-Vinkulativu ne’e atu hatudu vontade di’ak husi parte Governu nian hodi fó apoiu ba implementasaun investimentu ida ne’e.

Valór totál husi investimentu TL Cement  nian hamutuk USD Millaun 400 ne’ebé sei prodús simentu ba merkadu doméstiku no simentu ne’ebé sei iha estadu básiku fabriku nian (clinker) ba esportasaun. Investimentu ida ne’e sai hanesan investimentu naun-petrolíferu dahuluk ne’ebé nia valór boot liu investimentu hirak seluk iha Timor-Leste no sei implementa iha Munisípiu Baukau.

Investimentu ida ne’e sei presiza terrenu ne’ebe luan to’o ektare 600. Benefísiu husi investimentu ida ne’e aleinde produsaun simentu ho kualidade di’ak no sei redus mós importasaun ba simentu mai Timor-Leste, sei kria mós serbisu ba ema maizomenus na’in 650 husi faze dezenvolvimentu to’o produsaun.

“Investimentu ida ne’e konsidera hanesan investimentu estratéjiku ne’ebé sei oferese oportunidade serbisu sustentavel ba ita nia joven sira”, hateten Ministru Estadu Koordenadór Asuntu Ekonómiku, Estanislau da Silva. Ministru Estadu mós akresenta liu tan katak, impaktu husi investimentu ne’e sei ajuda hamenus númeru dezempregu, sei kontribui ba programa diversifikasaun ekonomia no sei estimula atividade ekonómika seluk ne’ebé signifikativu iha rai laran.

Prosesu avaliasaun ba investimentu ida ne’e envolve diretamente husi Autoridade Nasionál Petróleu no Minerais, Ministériu Petróleu no Rekursus Minerais, Ministériu Finansas, Gabinete Ministru Estadu Koordenadór Asuntu Ekonómiku, Ministériu Justisa, liu-liu Sekretaria Estadu Terras no Propriedades, Ministériu Komérsiu, Indústria no Ambiente, no TradeInvest Timor-Leste, I.P.

Iha eventu ida ne’e iha mós empreza tolu: Stamford Medical Centre Lda., L&O Unipessoal Lda. (otelaria), no Palm Springs Hotel, Lda., maka simu sira-nia Sertifikadu Investidór nian.

Iha Serimónia ne’e partisipa mós Ministra Solidariedade Sosiál, Isabel Guterres, Ministru Obras Públikas, Transportes no Komunikasaun, Gastão de Sousa, Ministru Petróleu no Rekursus Minerais, Alfredo Pires, Vise-Ministru Finansas, Hélder Lopes, sosiedade sivíl, no reprezentante Korpu Diplomátiku sira.

Haree iha ne’e deklarasaun ida husi Portavós Governu nian kona-ba asuntu ne’e.