Governu Timor-Leste

Ministériu Obras Públikas, Transportes no Komunikasaun hala’o sorumutuk koordenasaun Laboratóriu Enjeñeria nian, iha Dili, iha loron 2 fulan-maiu tinan 2016 hodi koa’lia kona-ba koordenasaun konvéniu Kooperasaun entre Laboratóriu Nasionál Enjeñaria Sivíl Portugál, Institutu Camões no Laboratóriu Enjeñaria Sivíl Komunidade Nasaun Lian Ofisiál Portugés sira (CPLP).

Ministru Estadu, Koordenadór Asuntu Ekonómiku no Ministru Agrikultura no Peskas, Estanislau da Silva, hateten katak maski sorumutuk ne’e ki’ik, maibé importante tebes atu hametin kooperasaun liuliu iha área laboratóriu enjeñaria sivíl nian.

Ministru ne’e esplika  katak “Iha Laboratóriu Enjeñaria Sivíl nian sira ne’e maka Estadu tenke konfia kompeténsia fundamentál sira ba promosaun kualidade konstrusaun nian, iha planu suporte sientífiku, ba regulasaun no ba akompañamentu atividade konstrusaun nian, no mós iha planu investigasaun iha ne’ebé ita tenke iha kapasidade atu buka hatene no antesipa futuru”. 

Ministru Estanislau da Silva hatutan katak “Timor-Leste konta ona, to’o oras ne’e, ho soidariedade Internasionál, ne’ebé fahe ba forma kooperasaun nian oin-oin. Konvéniu ida ne’e sai hanesan prova ida tan husi kooperasaun ho ita-nia nasaun maun-alin sira husi CPLP”.

Partisipa mós iha sorumutuk ne’e, Prezidente Zona Ekonomia Espesíal Sosoiál Merkadu nian, Mari Alkatiri, Prezidente Komisaun E Parlamentu Nasionál, Pedro Mártires, Reitór Universidade Nasionál Timor Lorosa’e, Francisco Miguel Martins, Korpu Diplomátiku sira, reprezentante sira husi Gabinete Apoiu Prezidénsia Rotativa CPLP nian iha Timor-Leste, delegadu husi Laboratóriu Enjeñaria Sivíl husi CPLP  no konvidadu sira seluk.