Ministériu Saúde simu ekipamentu báziku husi Organizasaun Saúde Mundiál
Ministériu Saúde simu ekipamentu báziku sira, hodi apoia programa Saúde iha Família, ne’ebé lansa iha tinan 2016. Ekipamentu sira ne’e entrega hosi Organizasaun Saúde Mundiál (WHO, sigla iha lia-inglés) Timor-Leste, iha loron 27 fulan-abríl tinan 2016.
Ekipamentu sira hanesan markeza hamutuk 12, laringoskópiu (71), esterelizadór (71), reanimadór manual (71), kolorímetru (71), maka (71), karriñu (55), relójiu (190), termómetru (734), esfigmomanómetru ka aparellu hodi sukat tensaun arterial (367), estetoskópiu (367), lanterna (367), dasi hodi tetu kosok oan (367), auriskópiu (367), dasi (367) no insineradór ida lixu ospitalár nian.
Ministra Saúde, Maria do Céu, hateten: “Ita hetan tan apoiu ekipamentu báziku husi Organizasaun Saúde Mundiál hodi apoia programa Saúde iha Família. Husu ba Diretór-Jerál Prestasaun Saúde, atu koordena mekanizmu distribuisaun ekipamentu sira ne’e to’o baze, hodi implementa lalais programa Saúde iha Família ne’e la’o ho susesu”.
Entretantu, reprezentatante Organizasaun Saúde Mundiál,Dr. Rajesh Pandav, hatete katak nia fiar Ministériu Saúde sei halo esforsu tomak, atu distribui ekipamentu sira bapostu Saúde sira iha Timor-Leste.
“Mekanizmu distribuisaun tenke di’ak atu kontrola no kuidadu sasán hirak ne’e. Karik presiza, fó mós formasaun ba pesoál Saúde kona-ba oinsá uza ekipamentu sira ne’e ho di’ak, inklui halo manutensaun regulár ba sasán sira ne’e” hateten Rajesh Pandav
Programa Saúde iha Família ne’e hanesan pakote abranje kuidadu saúde primária, ne’ebé lansa husi Primeiru-Ministru, Rui Maria de Araújo, iha fulan-abríl tinan 2015. Ninia implementasaun hahú iha fulanjullu tinan 2015 iha Munísípiu Dili no kontinua ba munisípiu 11 seluk, inklui rejiaun Autonómu Oecusse-Ambenu. Programa ida ne’e, presiza apoiu instrumentu médiku no instrumentu la’ós-médiku nian sira.
Totál uma-kain iha Timor-Leste, tuir Sensu Nasionál 2015 nian, hamutuk 206,483. Uma-kain sira ne’ebé hetan vizita hosi pesoál saúde nian to’o loron 24 fulan-abríl 2016 hamutuk 39.043.
Tuir meta ne’ebé define ona hosi Ministériu Saúde, iha loron 28 fulan-novembru 2016, komunidade hotu iha Aldeia 2.225, tenke hetan ona vizita husi pesoál Saúde sira liuhusi programa Saúde iha Famíla.
