Governu Timor-Leste

Ministru Justisa Timor-Leste, Ivo Valente iha kualidade hanesan Prezidente Konferénsia Ministru Justisa País sira Lian Ofisiál Portugés nian (KMJPLOP), loke ofisialmente Sorumutuk da-2 kona-ba Pontu Kontaktu nian sira husi Rede Judisiária CPLP, iha Pousada de Lisboa, Praça de Comércio Lisboa - Portugál, iha loron-kuarta, 20-fulan-abríl tinan 2016.

Iha nia diskursu, Prezidente KMJPLOP, Sorumutuk Rede Judisiáriu nian importante tanba sai hanesan ferramenta ne’ebé progresivamente tulun kontrusaun komum justisa  nian ba Komunidade País sira Lian Ofisiál Portugés.“Reuniaun ida-ne’e importante tebes atu diskute no loke kolaborasaun ba realizasaun Konvensaun tolu ne’ebéselebra ona iha tinan 2005”, nia dehan.

Konvensanun tolu ne’ebé Estadu-Membru sira Konferénsia Ministru Justisa País sira Lian Ofisiál Portugés tenke implementa maka Convenção de Auxílio Judiciário em Materia Penal [Konvensaun kona-ba Auxíliu Judisiáriu iha Matéria Penál; Convenção de Extradição entre Países da CPLP [Konvensaun kona-ba Estradisaun entre Nasaun CPLP nian sira];  no Convenção sobre a Transferência de Pessoas Condenadas [Konvensanun kona-ba ema sira ne’ebé hetan Kondensaun]; hodi empeña dinamizasaun Rede Judisiária CPLP nian no aplika mekanizmu própriu ba atribuisaun ho utilidade ne’ebé boot liu.

Liga fali ba kooperasaun sira,  Ivo Valente husu atu rede luzófona nian ne’e halo aproximasaun ho rede sira seluk no informa “Ita sei asina Memorando Entendimentu ho Konferénsia Ministru Justisa nian sira hosi Nasaun Iberu-amerikanu (COMJIB, akrónimu iha lian españól) hodi loke dalan ba artikulasaun entre Rede Ibero-amerikanu ba Kooperasaun Jurídika Internasionál (IberRED) no ita-nia Rede Judisiária CPLP”.

Iha okaziaun ne’e, Prezidente Ivo Valente ko’alia mós kona-ba finansiamentu Rede Judisiária CPLP nian, programa no mekanizmu administrasaun nian sira Sekretariadu Permanente Konferénsia Ministru Justisa nian no disponibilidade apoiu nesesáriu husi Timor-Leste, nu’udar nasaun ne’ebé kaer knaar Prezidénsia KMJPLOP nian.

Marka prezensa iha sorumutuk ne’e, Pontu Kontaktu Rede Kooperasaun Jurídika no Judisiária Internasionál País sira Lian Ofisiál Portugés, ne’ebé kompostu husi Timor-Leste, Angola, Brazíl, Giné-Bisau, Kabu Verde, Mosambike, Portugál no Saun Tomé no Prínsipe.

Durante estadia iha Portugál, Ministru Justisa mós halo vizita ba iha Institutu Rejistu Notariadu (IRN) husi Ministériu Justisa Portugál nian iha Lizboa, iha loron-kinta, 21 fulan-abríl. Hodi hasoru malu ho Prezidente IRN José Ascenso Nunes da Maia, iha ne’ebé sira koa’lia kona-ba oinsá IRN Portugál presta servisu ba sidadaun no empreza sira iha ámbitu identifikasaun sivíl no rejistu sivíl, nasionalidade, prediál, komersiál, beins imoveis no mós pesoa koletiva.

Iha oportunidade ne’e, Ministru Ivo Valente informa mós kona-ba programa Ministériu Justisa nian atu haruka notáriu estajiáriu husi Diresaun Nasionál Rejistu Notariadu (DNRN) ba Portugál iha fulan-maiu tinan 2016 hodi aprende prátika no servisu notariadu nian durante fulan haat.