Ministru Justisa hasoru malu ho reprezentante ASEAN nian iha Lizboa
Ministru Justisa Timor-Leste nian, ne’ebé oras ne’e dadaun kaer mós knaar hanesan Prezidente Konferénsia Ministru Justisa País sira Lian Ofisiál Portugés (KMJPLOP), Ivo Valente, hasoru malu ho Embaixadór Filipina nian ne’ebé sai mós nu’udar reprezentante ASEAN [Asosiasaun Nasaun sira husi Sedeste Ázia nian] nian iha Portugal, Phillipe J. Lhuillier, iha Lizboa, iha loron 18 fulan-abríl tinan 2016.
Iha sorumutuk ho karakter amigavel ne’e, sira fahe informasaun ba malu kona-ba estatutu Timor-Leste nian hanesan membru no, dadaun ne’e hanesan, lider KMJPLOP nian, papél Konferénsia Ministru Justisa sira nian ne’e iha relasaun ho dezenvolvimentu sosiál, ekonómika, judisiál no komersiál no relasaun entre Konferénsia ne’e ho nia omóloga husi ASEAN.
Embaixadór Lhuillier, husi nia parte hato’o nia prontidaun atu loke kontaktu no posibilidade atu kria relasaun ho KMJPLOP. Iha parte seluk, nu’udar embaixadór Governu Filipina nian, nia dehan katak sei ko’alia ho nia Governu atu ajuda Governu Timor-Leste hodi adere ba ASEAN.
Marka prezensa iha sorumutuk ne’e, Sekretáriu Ezekutivu KMJPLOP, Nelinho Vital, Embaixadór CPLP, Antonino de Araújo, Konsul Jenerál Filipina nian, Gines Jaime Ricardo Gallaga, Asesór Gabinete Ministru Justisa, no membru asesoria téknika CPLP nian iha Lizboa.
