Governu Timor-Leste Lansa Sentru Ikan Tilápia iha Gleno
Governu Repúblika Demokrátika Timor-Leste (RDTL), liuhusi Ministru Estadu Koordenadór ba Asuntu Ekonómiku (MECAE) no Ministru Agrikultura no Peska (MAP), Eng. Estanislau da Silva lansa fini ikan Tilápia hamutuk 10, 200 iha sentru produsaun Glenu, Ermera, Kinta loron 31 fulan-marsu 2016. Programa ne’e hetan apoiu husi Governu Nova Zelándia.
Tuir Ministru Estanislau da Silva, durante ne’e parseiru kooperasaun entre Governu Timor-Leste no Nova Zelándia la’o di’ak tebes. “ Agradese ba Governu Nova Zelándia, ne’ebé durante ne’e fó apoiu di’ak ba Ministériu Agrikultura iha área Akuakultura no mós ba reabilitasaun kultura kafé nian.”
Ministériu Agrikultura no Peska (MAP) servisu hamutuk World Fish Center no National Institute of Water and Atmospheric Research (NIWA), fahe fini Tilápia ba sentru produsaun ikan iha Munisípiu Manufahi, Vikeke, Maliana, no Baukau. “ Ikan importante tebes ba konsumu, liuliu ba labarik sira, atubele loke sira-nia hanoin,” ministru dehan. Dezenvolvimentu akuakultura sai prioridade ba Governu tinan ida ne’e, inklui programa reabilitasaun kafé.
Entretantu, Embaixadór Nova Zelándia ba Timor-Leste, Jonathan Douglas Schwass hateten, Governu Nova Zelándia mós fó prioridade ba área agrikultura no área hirak ne’ebé mak hanesan,” nia tenik tan.
