Prezidénsia timorense iha Konferénsia Ministru Justisa CPLP hetan louvor husi Prezidente Portugál nian
Ministru Justisa, Ivo Valente, partisipa iha abertura konjunta sorumutuk membru Konsellu Superiór sira Justisa nian no Pontu Kontaktu nian sira husi Rede Judisiária Komunidade País sira Lia Ofisiál Portugés nian (CPLP-sigla iha lia-portugés), iha loron 19 no 20 fulan-abríl, iha Supremu Tribunál Justisa, iha Lizboa.
Iha abertura ne’e, marka mós prezensa Prezidente Repúblika Portugál nian, Marcelo Rebelo de Sousa, ne’ebé iha nia diskursu, louva atuál prezidénsia Timor-Leste nian iha CPLP, “prezidénsia ida ne’ebé frutuoza (ne’ebé fó rezultadu di’ak sira) no ida ne’ebé loke perspetiva ba ezbosu estratéjia foun nian ida ba futuru”.
Tuir Ministru Timor nian ne’e, Prezidente Marcelo Rebelo de Sousa ninia hatan hodi diriji abertura sorumutuk ne’e nian hanesan faktu ne’ebé “atu hatudu ba públiku signifikadu no importánsia ne’ebé aas kona-ba eventu hirak ne’e no ba knaar ne’ebé fó ba organizasaun majistratura nian sira no ninia sistema dixiplina no kontrolu”.
Serimónia ne’e hetan partisipasaun husi Prezidente Supremu Tribunál Justisa no Konsellu Superiór sira Majistratura Angola, Giné-Bisau, Kabuverde, Portugál no Saun Tomé no Prínsipe, no mós Ministra Justisa Portugál nian, Francisca Van Dunem.
Ministru Justisa Timor-Leste nian, Prezidente Konferénsia Ministru Justisa sira husi País sira Lia Ofisiál Portugés, Ivo Valente, hatete katak “bainhira ami observa ezbosu jerál sira husi arkitetura konstitusionál ita-nia Estadu sira nian, prova katak eziste órgaun independente no autónomu ida, ne’ebé nu’udar respons’avel ba jestaun no dixiplina majistratura judisiál, ne’ebé konserva ideia esensiál autogovernu nian no garante inkluzaun demokrátika husi órgaun soberania ne’e, mak tribunál rasik, hodi respeita prinsípiu demokrátiku sira”.
Durante hela iha Lizboa, Ministru Timor nian ne’e hala’o ona vizita badak ida ba Sede CPLP nian no hasoru malu ho Sekretáriu Ezekutivu, Embaixadór Murade Murargy, iha ámbitu sorumutuk sira Konsellu Superiór Justisa nian no Pontu Kontaktu nian sira husi Rede Judisiária CPLP nian.
Foto: Portal da Presidência da República Portuguesa
