Timor-Leste selabra Loron Mundiál Saúde
Ministériu Saúde servisu hamutuk ho Organizaun Mundial Saúde (OMS) selebra loron Mundiál Saúde nian iha Dili, iha loron 7 fulan-abríl tinan 2016. Tema husi Selebrasaun ne’e mak “Advokasia ba prevensaun no kontrolu moras Diabetes iha Timor-Leste“
Ministra Saúde, Maria do Céu Pina Sarmento, hateten hanesan membru Nasoins Unidas nian, Timor-Leste mós adota Objetivu Dezenvolvimentu Sustentavel (ODS) liuhusi rezolusaun Governu nian no tuir despaxu Primeiru-Ministru nian Númeru 38, ne’ebé estabelese grupu ba ODS ne’ebé envolve organizmu no diresaun relavante sira husi ministériu hotu-hotu.
Timor-Leste mós sai membru nivel aas nian, hamutuk ho nasaun sira seluk, inklui Brázil, Kolómbia, Alemaña, Libéria, Áfrika Sul, Suésia, Tanzánia no Tunízia nian. País sira adota Ajenda 2030 kona-ba ODS, kompostu husi objetivu 17, sei orienta atividade sira komunidade internasionál nian durante tinan 15 oin mai.
Maria do Ceu reafirma, iha objetivu 3, inklui garantia kona-ba asesu ba móris di’ak ho kualidade no defeza moris-di’ak (prosperidade) ba ema hotu-hotu. Hein katakto’o tinan 2030 nasaun hotu-hotu tenke redús ona mortalidade permatura, liu-liu liuhusi prevensaun no tratamentu Diabetes.
Iha parte seluk, reprezentante Organizasaun Mundiál Saúde nian, Dr. Rajesh Pandav, hateten katak tuir relatóriu globál dahuluk husi OMS kona-ba diabetes, hahú tinan 1980 númeru ema ne’ebé sofre Diabetes sa’e besik dala haat..
Impaktu husi Diabetes, sente husi indivíduu, komunidade, família no ekonómia nasionál. “Diabetes hanesan móras ne’ebé karatéristika ho glukosa ne’ebé sa’e maka’as iha ran. Barak liu mak hetan diabetes tipu 2, tanba ladún halo dieta saudavel no atividade fízika.Ohin-loron adultu na’in ida husi ema na’in tolu, hetan todan boot. No ema ida ka liu husi ema na’in 10 mak hetan obezu,” nia dehan tan.
Diabetes tipu 1 maioria afeta labarik no foin-sa’e sira. “Ne’e presija hetan insulin loro-loron atu bele moris,” nia realsa.
