Governu Timor-Leste

Ministru Estadu Koordenadór Asuntu Administrasaun Estadu no Justisa,, Dionísio Babo Soares, inaugura website ( http://www.sefi.gov.tl) Fortalesimentu Institusionál nian, iha Salaun Otél Jl. Villa, iha Fatuhada, Dili,  loron 7 fulan-abril 2016.

Iha nia diskursu, Dionísio Babo Soares hateten katak Sekretaria Estadu Fortalesimentu Institusionál realsa liu ba dezenvolvimentu reforma institusionál.

Iha prosesu reforma administrasaun públika, Dionísio dehan tan, Governu aprova tiha ona gia ba reforma Administrasaun Públika, ne’ebé aposta iha aspetu haat maka hanesan: fortalesimentu institusionál, formasaun ba funsionáriu, funsionalizmu  públiku ne’ebé tutela ba Institutu Nasionál Administrasaun Públika no hasa’e kualidade funsionalizmu públiku  husi Komisaun Funsaun Públika rasik. No nia fó hanoin mós katak fiskalizasaun no monitorizasaun maka sai hanesan responsabilidade husi Inspesaun- Jerál Estadu nian.

Ministru Babo dehan tan katak Sekretaria Estadu Fortalesimentu Institusionál, Komisaun Funsaun Públika, Institutu Nasionál Administrasaun Públika, no Inspesaun-Jerál Estadu nian, halo hela reforma iha aspetu lejislativu, rekursu umanu no institusionál.

Husi aspetu sira-ne’e, iha mós aspetu importante sira seluk  reforma administrative nian, ne’ebé la’o daudaun hela, liuliu iha ámbitu desentralizasaun administrative, territorial ka jeográfika.

Kona-ba website, Ministru dehan katak halo parte husi prosedimentu transparénsia atividade Governu nian no iha website ne’e sei publika  informasaun sira kona-ba dezenvolvimentu Administrasuan Públika. Website ida-ne’e sei kontein informasaun lubuk ida, hahúhusi istória to’o prosesu diagnóstiku, liuhusi gia  informasaun sira   instituisaun hotuhotu nian ne’ebé uza hanesan baze ida hodi bele halo sira nia diagnóstiku.

Marka mós prezensa iha lansamentu ne’e, Inspetór-Jerál Estadu nian, Franscisco de Carvalho, Prezidente Eleitu Konsellu Imprensa, Virgilio da Silva Guterres, Diretór Jerál sira no Diretór Nasionál sira husi Ministériu Administração Estatál.