SETP entrega Rai ba Santa Sé
Governu Timor-Leste liuhusi Sekretáriu Estadu Terras no Propriedade (SETP), Jaime Xavier Lopes, asina eskritura públika kona-ba direitu ba superfísie ho Santa Sé ne’ebé reprezenta hosi Núnsiu Apostóliku Santa Sé, Mgr. Joseph Marino iha ne’ebé asiste mós Sekretáriu ba Núnsiu Apostóliku iha Timor-Leste, Bispu Dioseze Dili no Baukau. Serimónia asinatura nian ne’e hala’o iha salaun Ministériu Negósius Estranjeirus no Kooperasaun, Dili, loron 18 fulan-marsu 2016.
Rai ho luan 10.020 metru kuadradu ne’e lokaliza iha aldeia Lirio, Suku Motael, Munisípiu Dili. Kada tinan Estadu Vatikanu, simbolikamente, sei selu arrendamentu rai ne’e nian ho totál dolar amerikanu 120 ba Estadu Timor-Leste, liuhusi Diresaun Nasionál Terras no Propriedades.
Sekretáriu Estadu, Jaime Xavier, Lopes esplika katak asinatura ba eskritura públika iha Timor-Leste, bazeia ba despaxu Ministru Justisa nian ho númeru 16/GM/MJ/III/2016, ho nia delegasaun kompeténsia hahú iha loron 11 Marsu, 2016, tuir Rezolusaun Governu Timor-Leste númeru 18/2015, 25 fulan-abríl.
Mgr. Joseph Marino, hanesan Núnsiu Apostóliku Santa Sé nian iha Timor-Leste no Manila sente kontente ho fatin ne’ebé maka Estadu Timor-Leste entrega ba Santa Sé hodi harii Nunsiatura Santa Sé ninia edifísiu iha Timor-Leste.
“Edifísiu ne’ebé sei harii iha tempu badak ne’e, hanesan parte illas Papa nian, atu bele mós hakbesik an ba Sarani Katóliku iha Timor-leste,” nia dehan tan
