Governu Timor-Leste asina Memorandu Entendimentu ho Sosiedade Civil ba tinan 2016
Governu Timor-Leste ho Sosiedade Civil asina Memorandu Entendimentu, iha sesta-feira loron 18 fulan-marsu, iha Palásiu Governu.
Iha serimónia asina akordu ne’e, Primeiru-Ministru, Rui Maria de Araújo, hateten kartak prosesu dezenvolvimentu Timor-Leste kontinua ezije partisipasaun husi organizasaun Sosiedade Civil nian, maibé persiza hatudu kualidade ne’ebe di’ak liutn.
Iha proposta hamutuk ema na’in-89 mak husi Unidade Apoiu Sosiedade Civil Gabinete Primeiru Ministru nian simu, ema na’in-83 maka tama iha prosesu selesaun, no ikusliuema na’in-49 maka pasa. Tuir análize ne’ebé ekipa avaliasaun halo, katak proposta sira ne’ebé maka pasa tanba iha méritu ne’ebe di’ak no realístiku.
Nune’e, Xefe Governu husu ba Organizasaun Naun Governamentál (NGO-sigla iha lia-inglés) sira atu hanoin iha kontestu méritu, ne’ebé hanesan pontu importante ida atu garante sustentabilidade partisipasaun NGO sira nian, tamba bainhira laiha méritu, sustentabilidade mós sei laiha:“Méritu iha proposta, méritu mós iha rezultadu sira. Buat rua ne’e mak tuir ha’u nia hare’e, maka garante sustentabilidade, funsionamentu NGO sira nian. Importante mak ita tenke produs rezultadu”.
Primeiru-Ministru Rui Araújo mós haktuir tan katak, tamba Governu fó apoiu finanseiru ba NGO ka ba Sosiedade Sivil sira la signifika katak sira tenke halo tuir saida maka Governu hatete. Maibé bainhira iha hanoin ne’ebé la hanesan, idea ka opiniaun bele hato’o tuir demokrasia ba malu maibé tenke respeita lei no Konstituisaun.
Tuir Kordenadór Unidade Apoiu Sosiedade Sivil nian, Joaquim Freitas, hatete liuhusi asina akordu ida ne’e hatudu oinsá parsería entre Governu ho organizasaun Sosiedade Sivil sira hala’o knaar ida importante tebes iha prosesu dezenvolvimentu nasionál.
Unidade Apoiu Sosiedade Sivil iha limitasaun finanseira tan ne’eorsamentu ne’ebé mak iha la sufisiente atu atende hotu proposta sira ne’ebé pasa iha tinan ida ne’e maibé sira ne’e sei tau iha prioridade iha tinan oin mai.
Reprezentante Sosiedade Sivil Florentino Sarmento, apresia no agradese ba ajuda ne’ebé Governu fó.
“Dalan sei naruk, maibé ami hanoin katak ho apoiu ne’ebé ami simu husi Governu, ami bele hatutan ami ida-idak nia objetivu, ami ida-idak nia preokupasaun, tanba Governu seidauk bele halo mesak ba-iha aspetu hotu-hotu sosiedade nian.”
Partisipa iha serimónia asina akordu ne’e, reprezentante husi Sosiedade Sivil hanesan, FONGTIL, Fundasaun ETADEP, Sentru Dezenvolvimentu Ekonómiku Popular (CDEP-sigla iha lia-portugés), Prospek, HEROIS, Institutu Haberan, Fundasaun Klibur Domin, Timor Aid, Asosiasaun Chega! Ba Ita (ACBIT), Asosiasaun Defisiente Timor-Leste (ADTL), APSC-TL, Esperansa Timor-Leste, FOKUPERS, Fundasaun de Colores Del Amor, ITA BA PAZ, JSMP (Judicial System Monitoring Program), MCEA, RAEBIA (Resilient Agriculture and Economy through Biodiversity Action), Institutu Matadalan Integradu, JNJ Advokasia, Parókia Nosa Señora Zumalai, Mosteiru Santa Clara no Koléjiu Salezianu Nosa Señora Fátima Fatumaka nian.
