SEKOMS – RTTL Asina Protokolu Transferensia Orsamentu 2016
Sekretária Estadu Komunikasaun Sosial (SEKOMS) husi Prezidensia Konsellu Ministru (PCM) ho Rádio Televizaun Timor-leste (RTTL) asina protokolu tranferensia orsamentu tinan fiskal 2016 ho total $ 1,716 miliaun. Transferensia ida-ne’e atu fasilita instituisaun mídia publiku ne’e, ezekuta nia programa sira ho efesiente no efikas.
Iha serimonia asinatura ne’e, Sekretaria Estadu Komunikasaun Sosial reprezenta husi Sekretariu Estadu, Nelio Isaac Sarmento no RTTL reprezenta husi Prezidente Konsellu Administrasaun, Milena Abrantes.
Sekretáriu Estadu Komunikasaun Sosial, Nelio Isaac Sarmento iha nia intervensaun hateten, prosesu transferensia ne’e hanesan atus legal ba orsamentu RTTL, nuudar Empreza Públika no Estadu nia orgaun Independenti.
“Ho asina protokolu ne’e, Diretór Jerál Prezidénsia Konsellu Ministrus komesa ona prosesa tranferensia orsamentu ba ita-boot sira-nia konta bankária 100 %, hodi ezekuta servisu operasionál iha RTTL. Ita-boot sira mak sei jere rasik tuir mekanizmu legal no presta relatoriu utilizasaun orsamentu,” Nelio esplika.
Sekretária Estadu Komunikasaun Sosiál, hanesan Governu sei halo auditória ba RTTL, bainhira akontese erru ruma. Tanba ne’e, Konsellu Administrasaun RTTL tenke hatudu responsabilidade ba utilizasaun orsamentu.
“ Tinan 2016, hanesan tinan krusial ba RTTL. SEKOMS iha responsabilidade atu hato’o ba Primeiru-Ministru no Konsellu Ministrus, atu foti desizaun ruma karik iha situasaun ruma kona-ba osan ne’ebé entrega tiha ona maibé la ezekuta,” nia hateten.
Sekretáriu Estadu, Nelio Isaac mós husu ba servisu na’in sira iha RTTL, komesa husi funsiunariu baibain to’o Diretór sira, atu iha unidade pensamentu kona-ba servisu iha orgaun ida, ne’ebé iha nia hirarkia ho nia baze ba lei no regulamentu sira.
“Ha’u kumpriende, iha RTTL hotu-hotu goza ho nia liberdade hanesan média. Maibé husu atu konsidera mós mïdia públiku ne’e hanesan órgaun Estadu nian, ne’ebé la’o tuir ninia regra no prosidementu no responsabilidade ne’ebé difini tiha ona,” Neli dehan tan.
Partisipa serimonia ne’e, Diretór Jerál PCM, Vitor Maia, Diretór Nasionál Diresaun Nasionál Diseminasaun Informasaun (DNDI), Orlando da Conceição, Diretór sira husi RTTL, Asesor Nasionál - Internasional no funsiunariu sira.
