Forsa Defeza Timor-Leste no Indonézia organiza atendimentu saúde ba populasaun
Falintil-Forsa Defeza Timor-Leste (F-FDTL), hamutuk ho forsa Mariña Indonézia nian, ne’ebé hanaran Tentara Nasionál Indonézia (TNI), promove tiha asaun sosiál ida kona-ba atendimentu médiku ba populasaun, iha Portu Díli. Atividade ne’e hala’o tiha ona entre loron 20 fulan janeiru to’o loron 2 fulan-fevereiru tinan 2016, iha ró-ospitál Suharso Forsa Naval Indonézia nian.
Asaun gratuita ida ne’e ba populasaun timoroan envolve aleinde médiku militár sira indonézia nian iha mós espesialista timoroan sira. Espesialidade sira klíniku indonéziu nian, liuliu ba-iha área saúde ba matan (oftalmolojia) no ba nehan (estomatolojia. Nune’e mós halo akompañamentu ba kontinuidade tratamentu sirurjíku sira.
Xefe Estadu-Maior Jeneral F-FDTL nian, Komandante Jerál TNI no Ministériu sira Defeza no Seguransa hosi nasaun rua ne’e nian konkorda tiha ona atu hala’o programa konjutu ba atendimentu saúde nian ne’e ba populasaun Díli atuhodi selebra Aniversáriu ba da-15 F-FDTL nian, ne’ebé komemora iha loron 2 fulan-fevereiru tinan 2016.
Ofisiál ida husi Ministériu Defeza Indonéziu nian, ne’ebé mak akompaña atendimentu iha ró ne’e nia laran, deklara katak, ideia atu hala’o atividade sosiál ida ne’e, husi esperénsia eis-Primeiru-Ministru Kay Rala Xanana Gusmão nian, ne’ebé hahi’i tebes tratamentu médiku ne’ebé nia simu iha tempu balu iha Ospitál Gatot Subroto Forsa Terestre Indonéziu (TNI-AD) nian, iha Jakarta. Nune’e, Xanana Gusmão sujere katak Indonézia bele halo atendimentu saúde ba populasaun Timor-Leste nian, ho médiku espesialista indonéziu sira nian.
Ministru Defeza no Seguransa Indonézia, Jenerál ne’ebé Reforma ona Ryamzard Ryacudu, ne’ebé akompaña husi delegasaun ida, to’o iha Díli, iha loron 1 fulan-fevereiru no partisipa iha selebrasaun aniversáriu F-FDTL nian.
