Governu Timor-Leste

Ministru Negosius Estranjeiru no Koperasaun Timor-Leste, Hernani Coelho iha loron 17 Dezembru 2015, hala’o enkontru bilateral ho Sekretáriu Negosiu Estranjeiru Filipina, Albert Del Rosario iha Filipila. Enkontru ne’e hanesan parte atividade ida husi vizita ofisial Ministru Hernani Coelho iha ba Filipina, hahú loron 16 – 19 Dezembru 2015.

Iha enkontru ko’alia kona-ba koperasaun entre Timor-Leste ho Filipina iha area politika, ekónomia, komersiu, industria, defeza, saúde, edukasaun, agrikultura, turizmu, imigrasaun, kursu tekniku vokasional ba area infermajen no seluk tan. Diplomata rua ne’e mós partilla esperiensia kombate no hamenus ki’ak nomos oinsá implementa Public-Private Partnership.

Atu hametin liutan koperasaun iha futuru, parte rua konkorda atu tinan 2016, halo konsulta politika daruak iha Timor-Leste. Konsulta politika dahuluk hala’o fulan Juñu 2014 iha Manila.

Durante enkontru, governu Filipina kontinua reafirma sira-nia apoiu ba Timor-Leste nia adezaun ba ASEAN. Husu mós Timor-Leste atu fó apoiu ba Filipina nia kandidatura iha organizasaun internasional hanesan ICC, CEDAW, UNSC no IMO. “ Timor-Leste sei tau nafatin tau prioridade atu apoia nasaun belun sira hosi ASEAN,” Ministru Hernani Coelho hateten.

Hafoin enkontru ne’e, Ministru Hernani Coelho hamutuk ho delegasaun hasoru malu fali ho Diretór Jerál Insitutu Negosiu Estranjeiru Filipina, ko’alia kona-ba mekanizmu treinamentu ba diplomata Timor-Leste sira iha futuru.

Aprezenta Timor-leste

Iha loron 16 Dezembru 2015, Ministru Hernani Coelho hasoru malu mós ho Embaixadór sira hosi nasaun ASEAN, CPLP, ilha Pasifiku no grupu investór sira.

Iha sorumutu ne’e, Ministru Hernani Coelho ko’alia kona-ba prosesu dezevolvimentu Timor-Leste durante tinan 13 no dezafiu sira.. Ministru Hernani  agradese ba nasaun membru ASEAN no CPLP ba sira-nia apoiu durante ba Timor-Leste nia adezaun ba ASEAN.

“Wainhira iha futuru Timor-Leste sai nudar membru ASEAN, Timor-Leste sei halo esforsu tomak hodi kontribui ba realizasaun objetivu fundamental komunidade ASEAN,” Coelho dehan.

Iha vizita ofisial ne’e, Ministru Hernani Coelho akompanha hosi Embaixador Timor-Leste ba Filipina, Juvencio Martins, Diretór Interinu ba Assuntu Sudeste Aziatiku, Pedro Laranjeira, Diretora Protokolu no Xefe Gabinete Interina, Elisa da Silva no Pontu Fokal, Ines da Luz.