Governu Timor-Leste

Ministru Justisa, Ivo Valente, no Sekretáriu Estadu Konsellu Ministrus, Avelino Coelho, asina ona ho Camões – Institutu Kooperasaun no Lia nian [Instituto da Cooperação e da Língua], Institutu Públiku [Instituto Público] IP (sigla iha lia-portugés), ne’ebé maka reprezenta husi Embaixadór Portugál nian iha Dili, Manuel Gonçalves de Jesus, Protokolu kona-ba Apoiu ba Hadi’a Kualidade Servisu Públiku sira nian, [Protocolo de Apoio à Melhoria da Qualidade dos Serviços Públicos]  (PSAP- sigla iha lia-portugés) iha Nasaun Áfrika nian sira ne’ebé ko’alia Lia Ofisiál Portugés no Timor-Leste. Serimónia ne’e hala’o iha loron 28 fulan-janeiru, iha Sentru Formasaun Jurídika, iha Kaikoli, Dili.

Objetivu jerál husi akordu ne’e atu hadi’a sistema servisu públiku nasionál no lokál no halo sistema servisu sira ne’e fasil ba asesu husi sidadaun no empreza sira. Apoiu ne’e, sei haree liu-liu ba modernizasaun no informatizasaun Administrasaun Públika nian.

Protokolu ne’e envolve entidade nasionál oin-oin, hanesan Servisu Ordenadór Nasionál (Ministériu Negósius Estranjeirus no Kooperasaun), Diresaun Nasionál Rejistu no Notariadu (Ministériu Justisa) no Prezidénsia Konsellu Ministrus.

Asaun hirak ne’ebé mak sei dezenvolve tuir akordu ida ne’e, tama iha Planu Estratéjiku Setór Justisa Timor-Leste nian (2011-2030). Serbisu setór justisa nian sira tenke deskonsentra babeibeik, iha períodu ne’ebé mak prevee tiha ona, atu nune’e munisípiu hotu-hotu bele iha asesu ba pakote serbisu bazíku sidadania nian iha área ida ne’e, hanesan ezemplu emisaun billete identidade ba timoroan sira.

Reforsu Serbisu Justisa nian iha Munisípiu sira hakerek ona iha Programa Governu Konstitusionál  VI nian,  tantu iha ámbitu institusaun judisiál sira, liuhusi distribuisaun no kolokasaun  majistradu, prokuradór no defensór públiku barak liután iha territóriu nasionál, nune’e mós ho disponibilizasaun serbisu públiku sira rejistu notariadu nian.

Aleinde Ministru Justisa no Sekretáriu Estadu Konsellu Ministru nian, marka mós prezensa iha serimónia asinatura ne’e nian maka Diretór-Jerál Ministru Justisa nian, Henrique Oliveira Ximenes, Diretór-Jerál Prezidénsia Konsellu Ministru nian, Victor Maia, Diretora Nasionál Diresaun Nasionál Rejistu Notariadu nian, Maria Araújo, no autoridade no mós konvidadu sira seluk.