Governu Timor-Leste

Iha loron 27 fulan-novembru liubá, hala’o iha Dili, serimónia entrega sertifikadu partisipasaun nian sira iha asaun formasaun espesializada iha investigasaun kona-ba krime sira inséndiu nian.

Formasaun ida ne’e hala’o durante semana tolu no konta ho partisipasaun husi inspetór no peritu sira husi Polísia Sientífika Investigasaun Kriminál nian, no asegura husi ekipa ida ne’ebé konstitui husi Inspetór-Xefe nain rua, espesialista sira iha temátika ida ne’e, sira na’in rua husi Polísia Judisiária Portugál nian.

Asaun ida ne’e tama iha siklu formasaun tinan 2015-2016 nian, ne’ebé asegura formasaun téknika no dezenvolvimentu koñesimentu sira iha área investigasaun kriminál, polísia sientífika no análize laboratoriál sira, iha Timor-Leste, liuhusi kursu espesialidade nian besik sanulu.

Atividade ida ne’e tama iha Komponente Justisa husi Programa Apoiu nian ba Governasaun Demokrátika Timor-Leste, kooperasaun ne’ebé delega husi Uniaun Europeia iha Portugál iha Camões, IP.

Programa ne’e akompaña, dezde tinan 2012, kriasaun órgaun foun polísia kriminál nian ida ho espesializasaun aas, iha área fundamentál ida ba dezenvolvimentu nasaun nian, no halo serbisu iha parseria ho Ministériu Justisa Repúblika Demokrátika Timor-Leste nian no entidade lokál sira seluk.

Harii iha tinan 2014, Polísia Sientífika Investigasaun Kriminál nian ne’e kompostu husi investigadór hamutuk na’in 47 no peritu hamutuk na’in 31. Sira nia formasaun hala’o iha Dili no iha Portugál, iha Eskola Polísia Judisiária nian.