Governu Timor-Leste

Iha loron 6 fulan-novembru tinan 2015 liubá, hala’o serimónia entrega sertifikadu partisipasaun nian iha asaun formasaun espesializada iha investigasaun kriminál iha ámbitu halo osan falsu.

Asaun ne’e, hala’o durante semana rua, konta ho partisipasaun husi inspetór no peritu sira husi Polísia Sientífika Investigasaun Kriminál, tékniku superiór sira husi Banku Sentrál Timor-Leste nian no majistradu judisiál sira, no asegura husi ekipa ida ne’ebé konstitui husi Koordenadora Investigasaun nian ida no husi Inspetór ida, sira na’in rua ne’e maihusi Polísia Judisiária Portugál nian.

Asaun ne’e integra iha siklu formativu tinan rua nian 2015-2016, ne’ebé buka atu hadi’a formasaun téknika no dezenvolvimentu kompeténsia iha área invetigasaun kriminál, polísia sientífika no análize laboratoriál iha Timor-Leste, liuhusi asaun kuaze sanulu resin.

Projetu ne’e enkuadra iha Komponente Justisa nian kona-ba Programa Apoiu ba Governasaun Demokrátika Timor-Leste, kooperasaun ne’ebé delega husi Uniaun Europeia iha Portugál iha Instituto Camões, IP. Iha parseria ho Ministériu Justisa Timór nian no ho entidade lokál sira seluk, kooperasaun ne’e akompaña ona kriasaun órgaun polísia kriminál nia foun ida ho espesializasaun aas, área ida ne’ebé fundamentál ba dezenvolvimentu Timor-Leste nian dezde tinan 2015.

Polísia Sientífika Investigasaun Kriminál nian, ne’ebé kria iha tinan 2014, konstitui husi Investigadór na’in 47 no Peritu Forense na’in 31, sira hotu hetan formasaun iha ámbitu Programa ne’e nian, iha Timor-Leste no iha Eskola Polísia Judisiária, iha Portugál.

Marka prezensa iha serimónia ne’e Sekretáriu Estadu Terra no Propriedade, iha Ministru Justisa ninia fatin, reprezentante órgaun soberania nian sira, Delegasaun Uniaun Eurpeia no Embaixada Portugál nian.