Governu Timor-Leste

Iha fulan-setembru to’o outubru 2015, iha ámbitu Protokolu Kooperasaun entre Sekretaria Estadu Komunikasaun Sosiál Governu Timor-Leste nian (SEKOMS) no Centro Protocolar de Formação para Jornalistas (Cenjor), iha Lizboa, Portugál, [Portugal], hala’o tan asaun formasaun ida kona-ba kursu komunikasaun no interesaun ho media ba ofisiál komunikasaun Governu nian.

Objetivu husi kursu ne’e, atu aprende tan oinsá mak atu halo esklaresimentu ba públiku relasiona ho kestaun atualidade ruma no oinsá no bainhira mak atu divulga elementu informativu sira hosi instituisaun nian ne’ebé konsidera nu’udar interese públiku nian.

“Servisu hamutuk entre Sekretaria Estadu Komunikasaun Sosiál Timor-Leste nian ho CENJOR pozitivu tebtebes, tanba rezulta ona asaun formasaun oioin iha área komunikasaun sosiál nian. Tanba ne’e liuhosi koñesimentu no esperiénsia ne’ebé hetan, bele tulun benifisiáriu sira atu sai nu’udar mensajeiru loloos hodi hatutan informasaun hosi Estadu no Governu nian ba- iha públiku”,hateten Embaixadora Timor-Leste nian ba Portugal, Maria Paixão, iha sesaun enserramentu Kursu Komunikasaun no Interresaun ho Media, iha Lisboa, 27 Outubro 2015.

Kursu ne’e hala’o durante fulan ida ho balun hahú hosi loron 21 fulan-sSetembru no termina iha loron 27 fulan-outubru 2015. Matéria sira ne’ebé hanorin iha formasaun ne’e maka hanesan, téknika redatoriál sira, ateliê rádiu, ateliê televizaun, komunikasaun no suporta dijitál sira, jestaun krize nian no koñesimentu estratéjiku komunikasaun sosiál nian.

Formandu sira iha kursu ne’e kompostu hosi Orlando da Conceição, hosi SEKOMS, Luís Evaristo dos Santos Soares, SEKOMS, João dos Santos, SEJD, Sebastião Pereira, hosi Ministériu Administrasaun Estatál no João Bosco de Jesus Mendonça hosi Ministériu Solidariedade Sosiál.

Partisipa iha serimónia enserramentu ne’e, embaixadora Timor-Leste nian ba Portugál, Maria Paixão, Diretora CENJOR, Deolinda Almeida, Jornalista senior Adelino Gomes, Telmo Gonçalves hosi Entidade ReguladórKomunikasaun, ERC Portugál nian, Koordenadora Programa Komunikasaun Sosiál Uniaun Europeia nian delegada iha Portugál, Maria Assunção Reis, Formadór sira no pesoál servisu sira iha CENJOR.