Governu Timor-Leste

Sekretáriu Estadu Komunikasaun Sosiál, Nélio Isaac Sarmento, partisipa iha Sorumutuk IV ba Plataforma Entidade Reguladora (PER) ba Komunikasaun Sosiál País no Territoriu ne’ebé ko’alia lia-portugés, iha Sidade Praia [Cidade da Praia], Kabuverde [Cabo Verde], entre loron 2 to’o loron 6 fulan-novembru 2015. Tema ba sorumutuk ida ne’e maka “Dijitál no lia-portugés ba-iha Globalizasaun”.

Hafoin Lisboa iha tinan 2009, Saun Tomé no Prínsipe [São Tomé e Príncipe] iha tinan 2013 no Dili iha tinan 2014, to’o ona tempu ba Kabuverde atu asume kargu Prezidénsia PER nian hodi substitui Timor-Leste.

Iha loron dahuluk, membru sira PER nian no Ministru Prezidénsia Konsellu Ministru [Presidência do Conselho de Ministros] Kabuverde nian, Démis Lobo Almeida, hala’o sorumutuk iha edifísiu Ministériu Prezidénsia Konsellu Ministrus nian hodi debate kona-ba Sorumutuk IV nia ajenda.

Iha loron 3 fulan-novembru, servisu hirak ne’e loke ho intervensaun hosi Prezidente Asembleia Nasionál Kabuverde nian [Presidente da Assembleia Cabuverdiana], Jorge Carlos Fonseca. Tuir fali, hahú sesaun limitadu ida ne’ebé aprova ona proposta ba kandidatura Autoridade Reguladora Komunikasaun Sosiál Kabuverde nian (ARKSK) [Autoridade Reguladora da Comunicação Social Caboverdiana, (ARCSC)] ba kategoria membru ne’ebé iha direitu tomak ba PER.

Iha sesaun nakloke nian, ne’ebé mak aprezenta dezenvolvimentu no kestaun atuál hosi país oin-oin sira, xefe Gabinete SEKOMS, Dionísia Maria Sávio, fó hatene ba partisipante sira seluk kona-ba kriasaun Konsellu Imprensa [Conselho Imprensa] no prosesu migrasaun ba dijitál ba-iha Rádiu no Televizaun Timor-Leste (RTTL) nian.

Iha sorumutuk IV ne’e nia rohan, aprova ona Deklarasaun Praia nian [Declaração da Praia], ne’ebé asina hosi membru hotu-hotu.

Iha tempu hanesan, sira hala’o vizita kortezia ba órgaun sira soberania nian, hanesan Primeiru-Ministru, Prezidente Asembleia Nasionál no Prezidente Repúblika, nune’e mós ba Rádiu Televizaun Kabuverdiana (RTK) nian [Rádio e Televisão Cabuverdiana (RTC)] no lnforpress Ajénsia Kabuverde notísia (IAK) nian [Inforpress da Agência Cabuverdiana (IAC)], hodi haree besik liu servisu no ekipamentu sira institusaun  hirak ne’e nian. Partisipante sira sorumutuk ne’e nian hala’o vizita mós ba fatin istóriku sira illa ne’e nian, liuliu ba Sidade Vella [Cidade – Velha], ne’ebé ONU deklara nu’udar Patrimóniu Umanidade nian.

Plataforma Entidade Reguladora Komunikasaun Sosiál ba país sira ho lia-portugés kria iha loron 22 fulan-outubru tinan 2009 iha Lisboa. Mosu nu’udar forum ida ba debate no koperasaun nian, ba interkánbiu entre reguladora sira atuhodi investiga matéria sira ne’ebé iha ligasaun ho regulasaun Komunikasaun Sosiál nian.

Membru sira PER nian maka: Portugal [Portugál], Timor-Leste, Kabuverde, Mosambike [Moçambique], Angola, Giné-Bisau [Guiné Bissau], Saun Tomé no Prínsipe [São Tomé e Príncipe], no Giné Ekuatoriál [Guiné Equatorial]. Iha sorumutuk dahaat  ne’e, Giné Ekuatoriál no Saun Tomé no Prínsipe maka la partisipa.

Delegasaun Timor-Leste nian kompostu husi Sekretáriu Estadu Komunikasaun Sosiál nian [Secretário de Estado da Comunicação Social (SECOMS)], Nélio Isaac Sarmento, Xefe Gabinete SEKOMS nian Dionísia Maria Sávio, Asesór Ezekutivu SEKOMS nian, Rui Manuel Viana, Asesora ba Programa Komunikasaun Sosiál-Kooperasaun Delega husi UE iha Portugál, Camões I.P.,Maria Assunção Cardoso Reis, no Asesór Multimédia nian,  Evangelisto Gantry dos Santos Meilana.