Timor-Leste harii Parke Nasionál Kay Rala Xanana Gusmão
Primeiru-Ministru Dr. Rui Maria de Araújo halo deklarasaun ofisiál ba Parke Nasionál Kay Rala Xanana Gusmão iha Sábadu (24/10) hafoin halo tiha vizita ba-iha subar-fatin Komandante-em-xefe FALINTIL nian, Kay Rala Xanana Gusmão, iha Bunaria, Suku Soru Kraik, Postu Administrativu Hatudu Leolima, Munisípiu Ainaro.
Bainhira hetan tiha aprovasaun husi Konsellu Ministrus, iha loron 21 fulan-outubru 2015, Xefe Governu hateten katak, Parke Nasionál Kay Rala Xanana Gusmão hanesan fatin istóriku ne’ebé uluk Komandante-em-Xefe Falintil nian, ba dahuluk simu, jornalista Rádio Australian Broadcasting Corporation (ABC) Robert Domm, ne’ebé maka halo entrevista klandestina ida hodi fó sai informasaun ba mundu kona-ba luta Rezisténsia timoroan nian.
“Parke Nasionál ne’e simboliza rezisténsia, servisu no sakrifísiu tomak ne’ebé hala’o husi Frente Armada, Frente Diplomátiku ho Frente Klandestina. Ida ne’e, hanesan rekoñesimentu ida ba povu Timoroan ne’ebé terus durante tinan ruanulu resin lima nia laran,” esplika Rui Maria de Araújo.
Primeiru-Ministru hateten katak “Timoroan jerasaun uluk nian, jerasaun atuál no jerasaun sira tuirmai, iha obrigasaun ‘atu tara’ bandu no halo fatin ne’e hanesan fatin ita hotu nian. Bainhira ita mai iha fatin ne’e, ita hotu sei hanoin hikas fali katak, fatin ida-ne’e nu’udar fatin ba luta libertasaun no terus nian ne’ebé naruk ba rai ida-ne’e.”
Tuir planu, iha loron neennulu nia laran, Ministériu Agrikultura Florestas, ne’ebé responsável ba floresta, sei tau markasaun ba-iha área Parke Nasionál ne’e. Fatin ne’e kompostu husi fatin importante tolu maka hanesan: Abrigu Xanana Gusmão iha área Ai-Dila-Okir, fatin ne’ebé halo entervista dahuluk no ikusliu maka fatin ne’ebé kria bandeira Falintil nian.
Ba Komandante-em-Xefe, Kay Rala Xanana Gusmão, atuál Ministru Planeamentu, Investimentu no Estratéjiku hateten katak, jornalista Robert Domm “mai atu fó apoiu tanba nia sente katak iha injustisa, no tanba sira-nia Governu halo buat ruma ne’ebé ladún loos. Agora dala idatán, hafoin liu tiha tinan ruanulu resin lima, TV ABC mai atu hanoin hikas-fali ba saida maka mosu iha tinan hirak liubá no saida mak ita-nia hanoin ba Timor-Leste iha tempu oinmai.”
