Governu Timor-Leste

Primeiru-Ministru Dr. Rui Maria de Araújo halao vizita surpreza ba iha Diresaun Nasional Registu no Notariadu (DNRN), Ministériu da Justiça nian, segunda-feira (19/10), hodi hare’e diretamente kona ba funsionamentu diresaun ne’e.

DNRN halao atendimentu públiku atu legaliza dokumentus sira, trata Bilhete de Identidade, Passaporte, Nasionalidade, no funsaun seluk tan.

Primeiru-Ministru halao vizita ba Departamentus hotu DNRN nian hodi rona rasik husi funsionariu sira kona-ba lalaok servisu ne’ebe sira halao hodi fo atendimentu ba públiku. Durante vizita mos koalia rasik ho kliente sira hodi rona oinsa utentes rasik sira nia hanoin kona ba prosesu trata dokumentus importante ba moris sidadaun sira Timor-Leste nian. Primeiru-Ministru rona hosi klientes balun katak prosessu trata domumentus sei iha fallansu balun ne’ebe tenki hadia prosedimentus balun kona ba kriteria hosi mellora prestasaun servisus hirak ne’e.

Xefe Governu rona mos katak públiku lor-loron hamutuk por volta 100 mak hein trata passaporte no bilhete de identidade no prosessu pagamentu halao iha banku la os iha DNRN ne’ebe atraza tan prossessu atu hetan dokumentus hirak ne’e ho lais.

Banco Nacional Comércio Timor-Leste (BNCTL) iha interesse atu monta fatin iha DNRN atu klientes bele prossessa pagamentu iha fatin ida deit. Hosi parte Ministériu da Justiça sei hare possibilidade ba BNCTL hodi loke sira nia espasu para halo atividadi bankárias iha Diresaun ne’e nia laran.

Iha biban ida ne’e, Primeiru-Ministru mos husu atu Ministériu da Justiça bele konvoka reuniaun ida iha tempu badak hodi hare kona-ba unifornizasaun kartaun multifunsaun ba parte Saúde, Edukasaun, Banku, Eleitó r no sira seluk, tanba oras ne’e klientes hetan kartaun indivídual barak no diak liu koko atu akumula atividades ne’e hotu liu hosi kartaun úniku ida deit.

Akompaña visita hosi Primeiru-Ministru mak Ministru Justisa, Ivo Valenti, Directora Nasional Registo e do Notariado, Maria do R. Fátima Castro de Araújo no Inspector Geral-GIA, Francisco de Carvalho.