Timor-Leste hamosu impaktu iha Itália durante Espozisaun Milão 2015
Timor-Leste, iha tersa-feira, selebra ninia “Loron Nasionál”, iha Espo Milaun 2015, iha Milaun, Itália, ho programa espesiál ida ne’ebé partisipa mós delegasaun altu íivel nian ne’ebé halo viajen hosi Dili ba iha nebá. Durante Espo ne’e determina Loron Nasionál ida ba país idak-idak, tanba loron loron ida ne’e besik ba loron “Konsulta Populár”, hodi nune’e konkorda katak loron 1, fulan-setembru, maka sai nu’udar loron atu hatudu kultura, kafé no kór oin-oin Timor-Leste nian.
Iha dader-san, hafoin hala’o tiha desfile tradisionál ne’ebé remata iha edifísiu Timor-Leste nian, iha “cluster(ramu/klibur) kafé” nian, maka xefe delegasaun, Ministru Estadu no Prezidénsia Konsellu Ministrus, Agio Pereira, hato’o diskursu ofisiál.
País atus ida haatnulu resin lima, organizasaun internasionál tolu no ONG barbarak no reprezentante ‘naun-ofisiál’ sira maka partisipa iha Espo ne’e, ne’ebé loke nia oda-matan iha loron 1 fulan-maiu. Edifísiu Espozisaun Timor-Leste nian hamutuk ho país hirak ne’ebé tama iha klibur kafé nian “coffee cluster”, ho ninia tema “Ai-knanoik agrikultór kafé nian.”
Vizitante internasionál rihun-ba-rihun maka hetan kontaktu ho Timor-Leste ho ninia kafé, liuhosi aprezentasaun kultura sira, tapesaria (hena) Tais, espozisaun fotográfika no koko hemu kafe.
Akompaña Ministru Estadu Agio Pereira, maka Ministra Finansas, Santina Cardoso, no Ministru Obras Públikas, Transporte no Komunikasaun, Gastão Francisco Sousa. Elementu balu hosi Parlamentu Nasionál mós marka sira nia prezensa.
Eventu ida ne’e loke dalan ba Timor-Leste atubele hatudu nia an ba mundu, hamutuk ho impaktu pozitivu ida kona-ba turizmu, komérsiu no parseria internasionál sira.
Espo Milaun 2015 sei remata iha loron 31 fulan-outubru.
