Klínika epatite nian iha Timor-Leste inaugura ona
Ministériu Saúde, liuhusi Ospitál Nasionál Guido Valadares, komemora Loron Mundiál Epatite nian ho tema” Hamutuk Ita Previne Epatite ho nia Komplikasaun” iha serimónia ida ne’ebé hala’o iha Ospitál Nasionál Guido Valadares (ONGV), iha Dili, iha loron 28 fulan-jullu tinan 2015.
Iha loron hanesan, Diretór Óspitál Nasionál Guido Valadares, dr. Antonio Gusmão inaugura ofisialmente klínika nasionál ba konsulta moras epatite nian.
José dos Reis Magno, Diretor-Jeral Ministériu Saúde nian, esplika katak epatite mak moras inflamasaun ida-ne’ebé afeta ba ita-nia aten hodi halo nia sai moras. Fatór hirak ne’ebé sai hanesan kauza ba moras ne’e maka: jene, hanesan husi infesaun intro-organizmu; konsumu substansia kímika ne’ebé maka’as liu; no moras maka’as iha minutu balun nia laran.
“Importante liu ba ita atu hatene maka katak infesaun virus epatite realmente bele eziste iha ema nia isin-lolon ba tempu badak. Timoroan kuaze lubuk ida mak sofre ona moras ida-ne’e, hanesan mós iha mundu tomak,” nia hatutan.
Dezde tinan 2009 Timor-Leste deteta ona ema kuaze atus resin iha sinál moras epatite nian. Ba prevensaun no kombate moras ida-ne’e hodi la aumenta maka’as no atubele halo tratamentu ne’ebé di’ak, presiza harii klínika espesial ida atu timoroan sira bele konsulta moras ida-ne’e. Atu previne moras ida-nee presiza halo vasinasaun no fase liman ho sabaun molok han, konsumu hahan di’ak, adota kualkuer relasaun ne’ebé seguru no hadook an husi injesaun droga”, Diretór ne’e esplika.
Nia mós deklara katak sistema saúde iha Timor-Leste komesa ona estabelese polítika espesifiku ba prevensaun, kontrolu no tratamentu moras epatite nian, liuhusi redús tranzmisaun hodi redús mortalidade hodi hatutan katak “Klínika Nasionál ba konsulta epatite ne’e atu responde populasaun sira-nia nesesidade atu konsulta moras epatite. Klínika sei fornese informasaun hotu kona-ba moras epatite, hodi eduka populasaun sira previne tranzmisaun moras ne’e nian.”
Iha fatin hanesan, reprezentante Organizasaun Saúde Mundiál, Rajesh Pandav, hateten liuhusi Loron Mundiál Epatite nian, presiza hasa’e konxiénsia husi públiku jerál no pasiente sira ne’ebé sofre moras ne’e no promove urjentemente asesu ba servisu sira epatite nian, hodi hamate infesaun husi virus epatite nian ba ema nia moris.
Reprezentante ne’e mós hatutan katak ho klínika epatite nian iha Óspitál Nasionál Guido Valadares bele ona garante atendimentu ba populasaun sira ne’ebé mak hakarak hatene informasaun ka halo tratamentu ba moras epatite nian.
