Governu Timor-Leste

Primeiru-Ministru, Dr. Rui Maria de Araújo, ohin (24/07) iha salaun Sosiedade Sivíl, Palásio Governo nian, iha Dili, ofisialmente lansa partisipasaun Uniaun Nasionál Eskuteiru - Timor-Leste (UNE-TL) ba dahuluk iha Jamboree Internasionál tinan 2015.

Iha tinan ida ne’e Timor-Leste sei partisipa iha Jamboree Internasionál ne’ebé mak sei hala’o iha sidade Yamaguchi, Japaun, husi loron 28 fulan-jullu to’o loron 9 fulan-agostu tinan 2015.

Primeiru-Ministru, ho onra no orgullu, husik hela membru UNE-TL ne’ebe reprezenta Timor-Leste iha Jamboree Internasionál 2015 nian ne’e.

Ba eskuteiru sira Primeiru-Ministru haktuir katak partisipasaun Timor-Leste nian iha eventu ne’e iha importánsia boot tolu: Timor-Leste partisipa hanesan nasaun independente; partisipasaun ne’e koinside ho aprovasaun formál husi Governu, iha sorumutuk Konsellu Ministrus nian iha loron 21 fulan-jullu 2015, ba ezisténsia UNE-TL nian no; movimentu ne’e hanesan movimentu voluntariadu nian ida ne’ebé forma ema nia karakter no eduka foin-sa’e sira kona-ba moris iha natureza.

Ho razaun  hirak ne’e maka Xefe ezekutivu husu ba reprezentante Timor-Leste nian iha eventu ne’e atu hatudu hahalok di’ak. Ba UNE-TL einjerál, Rui Maria de Araújo husu atu hala’o movimentu eskutizmu nian iha Timor-Leste tuir duni fundadór dahuluk ekuteiru nian, Lord Baden Powell, ninia doutrina, tanba ne’e, dirijente sira tenke iha vizaun ne’ebé klaru kona-ba dezenvolvimentu movimentu ne’e nian no ba Kamiñeiru sira atu fó ezemplu ne’ebé di’ak ba Esploradór, Lobitu no Aveziña sira.

Rui Maria de Araújo, aproveita oportunidade ne’e fahe mós nia esperiénsia: “Ha’u aprende lideransa iha eskutizmu laran. Ha’u aprende oinsá serbisu iha ekipa liuhusi halo patrullamentu eskutizmu nian.“ Xefe Governu nian ne’e hatutan tan katak eskutizmu, tantu Estadu nian no mós katóliku nian, hanorin ema, husi ki’ik kedas, kona-ba oinsá hasoru difikuldade no ultrapasa barreira no mós kona-ba valór sira hanesan dixiplina, serbisu iha ekipa, kooperasaun no respeita malu. Istória mós hatudu katak ukun-na’in sira barak iha mundu liu mós husi movimentu eskutizmu nian no bainbain, iha  sosiedade nia leet eskuteiru sira sepmre hakat ida iha oin kompara ho ema ne’ebé la’ós eskuteiru.

Aleinde ne’e, Primeiru-Ministu apela ba eskuteiru sira atu labele partisipa de’it maibé tenke buka estuda no tenke sai hanesan ema dahuluk ne’ebé hadomi natureza.

Xefe Governu nian ne’e informa mós katak Governu VI sei fó apoiu tomak ba UNE-TL nia serbisu no asume responsabilidade atu kria kondisaun hirak ne’ebé presiza atu movimentu ne’e bele la’o ba oin.

Ikus liu, Primeiru-Ministru dezeja votu sussesu nian ba membru UNE-TL nian sira ne’ebe sei partisipa iha Jamboree Internasionál 2015 iha Japaun no husu ba membru UNE-TL atu buka halo kontaktu no estabelese rede amizade ho irmaun eskuteiru sira husi nasaun sira seluk hodi nune’e bele habelar liután movimentu eskutizmu nian iha Timor-Leste