Governu Timor-Leste

Primeiru-Ministru, Dr. Rui Maria de Araújo, hamutuk ho delegasaun Governu nian, iha sábadu liubá, hala’o vizita ba instituisaun edukasaun istórika, Eskola Téknika Vokasionál Kolégio Dom Bosco Fatumaka, iha Munisípiu Baukau, Timor-Leste.

Vizita governamentál ida ne'e fó seguimentu ba vizita kortezia husi Diretór Eskola ne’e nian, padre Elísio Locatelli SDB, ba Primeiru-Ministru foin lalais iha Palásiu Governu, Dili.

“Koléjiu Dom Bosco Fatumaka nu’udar ezemplu iha Área Ensino Técnico-Vokasionál profisionál nian tanba ne’e joven sira ne’e hili dalan ne’e nu’udar dalan di’ak ba sira," hatete Primeiru-Ministru.

Xefe Governu hatete tan katak governu sei intensifika atensaun ba eskola téknika-vokasionál iha rai laran tanba formandu tékniku mak sei suporta aumenta rezultadu dezenvolvimentu nasionál.

"Ida ne'e prioridade ba governu tanba rezultadu dezenvolvimentu Timor-Leste depende maka’as husi formasaun Eskola Téknika sira nian."

Primeiru-Ministru salienta mós katak ema matenek iha área tékniku sei limitadu tanba ne’e, ba oin tenke intensifika formasaun téknika atu nune’e sira mós bele partisipa iha prosessu dezenvolvimentu nasionál nian.

Iha biban hanesan, Primeiru-Ministru koa’lia no rona mós hosi mestre no alunu sira kona-ba sira-nia esperiénsia no ensinu iha Koléjiu Fatumaka. "Eskola Tékniku Vokasionál nia papél importante tebes tanba ne’e preokupasaun rona husi mestre sira sei alista atu nune’e bele diskute kle’an liután ho Ministeriu Edukasaun atu bele revé no reajusta nesesidade sira ne’ebé presiza hodi responde ba dezafiu no nesesidade sira ne’ebé mak Timor-Leste hassoru," hateten tan Primeiru-Ministru.

Primeiru-Ministru apela mós ba joven sira atu hanoin didi’ak hodi deside matenek sa’ida mak sira presiza tanba husi perspetiva dezenvolvimentu Timor-Leste nian ba oin sei naroman tebes tanba ne’e presiza tebes joven sira ho kapasidade téknika atu bele kompete iha merkadu traballu.

Durante vizita ne’e, Primeiru-Ministru no delegasaun governamentál haree direitamente fatin formasaun téknika inklui Departamentu Enjeñaria Eletrónika, Eletrisidade, Mekánika no Makinaria. Aleinde fatin formasaun delegasaun vizita mós armazén ai-han no pekuária nian.

Husi koléjiu Fatumaka, Primeiru-Ministru no delegasaun kontinua vizita ba iha Suku Ossoqueli, Postu Administrativu Vemase, iha Munisípiu Baukau.

Notísia ne'e disponível mós iha seksaun Multimédia nian.