Komisaun Organizadora no RAEOA prepara komemorasaun tinan 500 Afirmasaun Identidade Timoroan nian
Komemorasaun tinan 500 Afirmasaun Identidade Timoroan nian, ne’ebé sei marka tinan 2015 ne’e, sai hanesan tema husi sorumutuk entre Ministru Estadu, Koordenadór Asuntu Administrasaun Estadu no Justisa, Dionísio Babo, nu’udar Prezidente Komisaun Organizadora nian, no Prezidente Autoridade Rejiaun Administrativa Espesiál Oe-kuse Ambenu (RAEOA), Mari Alkatiri. Sorumutuk ne’e hala’o iha loron 16 fulan-jullu, iha Gabinete Zona Espesiál Ekonomia Sosiál Merkadu (ZEESM) nian, no ninia objetivu prinsipál maka halo remata preparativu ba selebrasaun hirak ne’ebé atu hala’o tinan ne’e iha Timor-Leste.
Pontu aas husi selebrasaun hirak ne’e sei hala’o iha loron 28 fulan-novembru, Loron Proklamasaun Independénsia nian. Tau dadaun ona iha programa, atividade oin-oin ne’ebé atu hala’o iha nasaun laran tomak, liuliu ba iha Oekuse Ambenu, iha ne’ebé sei halo rekreasaun istórika ida kona-ba enkontru dahuluk misionáriu portugés sira ho populasaun Timór nia sira no sira-nia xefe sira.
Atividade sira ne’e hala’o tuir abordajen istórika, kulturál no intelektuál, no haree liubá papél Igreija Katólika nian iha Istória Timor-Leste nian. Durante tinan 500, Igreija Katólika fó ona apoiu espirituál, umanu no material ida ne’ebé boot ba povu, liuliu papél ne’ebé nia dezempaña iha tempu okupasaun Indonézia nian, ne’ebé kontribui ona ba lejitimasaun no kredibilizasaun internasionál ba Rezisténsia .
Festividade sira ne’e prepara tiha ona iha kedas tempu balun liubá husi Komisaun ida ne’ebé hetan aprovasaun iha Sorumutuk Konsellu Ministrus nian, iha fulan-abril tinan ida ne’e. Halo parte iha Komisaun ne’e reprezentante sira husi ministériu no sekretaria Estadu oin-oin no mós reprezentante sira husi autoridade RAEOA nian.
