Governu Timor-Leste

Primeiru-Ministru, Rui Maria de Araújo, halo lansamentu ba Sentru Formasaun Nicolau Lobato (SFNL) iha kuarta ne’e, loron 5 fulan-jullu, iha Suku Leorema, Postu Administrativu Bazartete, Munisípiu Likisá.

SFNL fó formasaun ba timoroan kona-ba oinsá sira bele sai promoter ba ekónomia família nian liuhusi hala’o atividade área florikultura ka kudaa ai-funan no mós ortikultura ka kuda modo no ai-fuan iha kontestu ekonomia família nian.

“Ne’e orgullu boot ida mai ha’u tanba ho ida-ne’e haburas ekonomia uma laran ka familiár. Luis Lobato, uluk Vise Ministru Saúde, ami lansa hamutuk programa Saúde ba Família. Agora ami hamriik fali iha ne’e, lansa fali oinsá haburas ekonomia família liuhusi atividade florikultura no ortikultura", hatete Primeiru-Ministru.

Iha biban hanesan, formandu SFNL na’in 53 (mane na’in 42 no feto na’in 10) husi munisípiu 12, simu manuál no materiál formasaun nian.

Primeiru-Ministru louva emprezáriu sira, hanesan Luis Lobato tanba bele loke atividade emprezariál iha área espesífiku florikultura no ortikultura nian iha Leorema no mós Lino Lopes ne'ebé hala’o mós atividade ortikultura nian iha Loes, Munisípiu ne’ebé hanesan.

“Ideia atu hamosu pioneiru no promotór ekonomia família nian ida ne’e murak teb-tebes. Mehi ida ne’ebé povu iha, hamutuk ita bele harii nasaun husi baze atu família hotu-hotu bele hetan osan liuhusi ortikultura no husi ai-funan," Primeiru-Ministru hatete.

Durante vizita ne'e Primeiru-Ministru ho nia komitiva vizita mós Postu Saúde foun no Eskola Sekundária Nicolau Lobato hodi ko’alia ho estudante sira. “Imi tenke estuda didi’ak, estuda ho badinas. Kona-ba falta livru,  Governu sei tau-matan ba imi-nia nesesidade eskola nian, liuhusi Ministériu Edukasaun," Primeiru-Ministru promete.