Governu Timor-Leste

Primeiru-Ministru, Rui Maria de Araújo, partisipa iha abertura sorumutuk ministeriál ba reprezentante husi ministériu turizmu husi CPLP (Comunidade dos Países da Língua Portuguesa), ho tema “O Turismo e a Globalização”, iha sesta ne’e loron 7 fulan-jullu, iha Sentru Konvensaun Dili.

Primeiru-Ministru informa katak sorumutuk ne'e atu deskute no fahe ideia no esperiénsia kona-ba prátika di’ak liu atu bele implementa iha setór estratéjiku turizmu nian atubele alkansa dezenvolvimentu ekonómiku.

"Maibé atu setór ne'e bele iha kreximentu, presiza atu tau hamutuk atrasaun ne’ebé oferese investimentu iha negósiu, infraestrutura no rekursu umanu liuliu iha nasaun emerjente tanba turizmu konsideradu nu’udar atividade ekonómika prinsipál," Primeiru-Ministru hatutan.

Xefe Governu salienta mós ba reprezentante ministeriál pasta Turizmu nian husi nasaun CPLP nian kona-ba nesesidade atu hatán ba ezijénsia kona-ba prokura no oferta iha merkadu ne’ebé presiza atu nasaun dezenvolve polítika hodi tulun dezenvolvimentu setór turizmu nian.

"Atu dada investidór nasionál no internasionál, tenke mós tau atensaun ba moris-di’ak no kualidade moris populasaun sira nian. Populasaun tenke sai nu’udar preokupasaun primeiru atu nune'e labele kria deziguldade, no hamosu turizmu inkluzivu no responsavel."

Primeiru-Ministru foka ba ekoturizmu no turizmu komunitáriu ne’ebé la haluha kestaun ambiente nian no mudansa klimátika ne’ebé sei afeta setór turizmu no mós kondisaun moris nian.

Ba reprezentante sira husi nasaun CPLP nian, Primeiru-Ministru mós hato'o katak esforsu ne’ebé hanesan tenke kanaliza ba promosaun nasaun sira komunidade ne’e nian ho espasu komún ba turizmu:"Objetivu mak atu promove no dezenvolve ekonomia, sosiál ita-nia nasaun."

Iha biban ida ne'e Primeiru-Ministru mós agradese ba Organizasaun Mundiál Turizmu nian tanba fó tiha ona apoiu ba dezenvolvimentu turizmu iha nasaun CPLP nian sira.