Governu Timor-Leste

Durante fulan jullu, profisionál timoroan na’in lima – jornalista, tékniku komunikasaun no tradutór – partisipa iha kursu Lian Portugés ne’ebé Aplika ba Jornalizmu no iha kursu kona-ba Formasaun Formadór nian husi Centro Protocolar de Formação para Jornalistas (Cenjor), iha Lizboa, Portugál.

Tama iha Protokolu Kooperasaun entre Sekretaria Estadu Komunikasaun Sosiál Governu Timor-Leste nian (SEKOMS) no Cenjor, projetu ne’e ninia objetivu maka promove dezenvolvimentu kompeténsia husi rekursu umans timoroan sira nian.

Formandu sira ho naran Elsa Ximenes, Suzana Cardoso, José Sarito Amaral, Maria Mercês do Carmo no Janio Gusmão maka profisionál Komunikasaun Timor-Leste nian dahuluk hirak ne’ebé tuir kursu ida kona-ba Formasaun Pedagójika Inisiál Formadór nian ne’ebé omologa iha Portugál, ne’ebé sei fó ba sira Sertifikadu Kompeténsia Pedagójika nian.

Hahú husi fulan-outubru, Cenjor sei simu tan formandu timoroan na’in 5, atu ba tuir kursu ida kona-ba Komunikasaun no Interasaun ho Média sira.

Kooperasaun ho Timor-Leste sai intensivu husikedas ona tinan 2012, tamba Programa Kooperasaun ne’ebé Delega ba Portugál husi Uniaun Europeia. Cenjor konklui tiha ona, iha tinan ida ne’e, kursu Jornalizmu Televizaun nian ida, durante fulan haat, ne’ebé fó ba profisionál Radio Televizaun Timor-Leste (RTTL) nian na’in 11, ne’ebé mak inklui mós estájiu iha RTP, Lusa TV no SIC. Iha loron 26 fulan-juñu, iha instalasaun sira RTTL nian, remata ona mós kursu ida kona-ba Edisaun Vídeo.

Programa ida ne’e, ne’ebé mak involve mós Camões – Instituto da Coooperação e da Língua, tenke kontempla mós realizasaun kursu ida iha kontestu laborál kona-ba kaptasaun imajen nian, to’o tinan 2015 nia rohan, iha Dili