Primeiru-Ministru fó Posse ba Komisáriu Foun 8 Komisaun de Omenagem nian
Primeiru-Ministru, Dr. Rui Maria de Araújo fó pose ba Komisáriu foun na’in 8 husi Komisaun Omenajen, Supervizaun, Rejistu no Rekursus nian iha Palásiu Governu, iha Dili, sesta-feira ne’e, loron 10 fulan-jullu nian.
Emposadu foun na’in sia ne’e mak Augusto Borges (Reci Cassa), Adão da Silva Rodrigues (Tuna), Cesar dos Santos da Silva (Merak), Domingos Soares Rangel (Neon Moris), Alfredo Cipriano Amaral (Maulear), Francisco Doutel Sarmento (Lamesak Tafaek), Gregório da Cinha Saldanha (Mouris), no Napoleão da Costa (Nazi).
Primeiru-Ministru ho laran ksolok fó pose ba komisariu foun 8 hodi hala’o sira nia knaar tuir direitu konstitusionál.
“Konstituisaun Artigu 11, rekoñese no fó valór ba kontributu husi sidadaun hotu-hotu ne’ebé luta ba independénsia nasionál no fó mós protesaun maka’as ba sidadaun hotu ne’ebé fó sira-nia vida hodi luta ba libertasaun Timor-Leste nian,” hatete Primeiru-Ministru.
Primeiru-Ministru hodi Governu nia naran hato’o liafuan agradesimentu espesiál ba Prezidente Komisaun Omenajen nian Virgilio Smith no mós komisariu sira ba sira-nia servisu tomak ne’ebé hala’o durante ne’e hahú husi 2006 no rekoñese mós knaar, dedikasaun, empeñu, responsabilidade, profisionalizmu hodi hala’o servisu ida ne’ebé todan.
“Ita hotu hatene katak númeru rejistu sira ne’e bo’ot. Ita bo’ot sira nia responsabilidade mak hala’o verifikasaun tuir lei ne’ebe iha, ba keixa ruma ne’ebé mosu, reklamasaun ruma ne’ebe mosu ho integridade tuir buat ne’ebé lei define tiha ona. Durante ne’e ita rona buat ne’ebé ladi’ak de’it mak ema fó sai, buat ne’ebé di’ak ne’ebé komisaun halo, dala barak ema la temi,” haktuir tan Primeiru-Ministru.
Xefe Governu enkoraja mós komisariu sira atu serbisu ho integridade no dedikasaun nafatin no manifesta apoiu Governu Konstitusionál VI nian liuhusi Ministériu Solidariedade Sosiál: “Ha’u depozita ba komisáriu foun sira, konfiansa no konviksaun katak sira sei hala’o funsaun ne’e ho zelu no dedikasaun tomak no la sei kahur interese polítiku partidáriu nian ho serbisu.
Lia menon ikus husi Primeiru-Ministru ba Ministra Solidariedade Sosiál, Isabel Amaral Guterres no ba Vise-Ministru Solidariedade Sosiál, Miguel Marques Manetelu, atu fó atensaun maka’as ba serbisu ne’ebé Komisariu sira hala’o hodi nune’e durante mandatu Governu ida ne’e nia laran bele kompleta serbisu balun ne’ebé seidauk kompletu.
