Governu Timor-Leste

Primeiru-Ministru Dr. Rui Maria de Araújo ohin kuarta-feira (13/05) hasoru delegasaun hosi Programa Nasoens Unidas ba Dezenvolvimentu (PNUD) kona-ba solusaun inovativu ba dezenvolvimentu Timor-Leste nian, iha Palásiu Governu, Dili.

Delegasaun PNUD lidera hosi Kordenadór Rezidente PNUD nian Sr. Knut Ostby no inklui PNUD nia Xefe Rejionál Sr. Joseph D’Cruz no PNUD nia Diretora Nasionál Sra. Noura Hamladji.

Iha biban ida ne’e, delegasaun PNUD nian halo aprezentasaun kona-ba oinsá Governu Timor-Leste bele uza ninia podér-de-kompra atu estimula ekonomia no atrai emprezáriu nasionál no internasionál.

Primeiru-Ministru apresia ba tulun ne’ebé PNUD presta ona ba Governu no Povu Timor-Lete no husu atu hametin lasu koopersaun ne’e iha futuru.

Primeiru-Ministru mós husu atu PNUD hanesan Organizasaun Nasoens Unidas nian ida iha Timor-Leste ne’ebé fornese konsellu téknika no asisténsia iha área prioritária sira governu nian bele fornese Konselleiru ba polítika ekonomika ida hodi bele servisu hamutuk ho ekipa Gabinete Primeiru-Ministru nian atubele avansa ho planu no idea sira ne’ebé aprezenta atu nune’e bele enkaixa ba orsamentu jerál tinan 2016 nian.

PNUD akonsella katak dalan ida atu hadi’a dezenvolvmentu ekonomia iha Timor-Lest maka liuhusi hadi’a lejislasaun sira hanesan kona-ba Rai no Propriedade no Asisténsia Kréditu husi Banku ba emprezáriu sira, no Timor-Leste presiza mós moris iha iha ambiente ida hakmatek atubele kria  funsionamentu governasaun nian ida di’ak ne’ebé sei dudu dezenvolvimentu Timor-Leste ba-oin.